Саха сирин 16 оройуонун оттугунан хааччыйар «Дьабарыкы Хайа» шахтаҕа өр сыллар усталарыгар таас чоҕу сир анныттан хостууллара. Ол эрээри билигин тэрилтэ чоҕу сир үрдүттэн аһаҕас хостооһуҥҥа көһөргө бэлэмнэнэр.
Ол курдук 4 массыына саҥа тэрили, 55 т. уйуктаах «БелАЗ» массыыналары, буурдуур станогы аҕаллылар. Анал биригээдэ кэлэн хомуйар, таҥар үлэлэри саҕалаан эрэр. 11 куб чоҕу биирдэ баһан ылар экскаваторы Нерюнгри куораттан аҕалыахтаахтар.
Саҥа үлэ көрүҥэр көстөхтөрүнэ буурдуур үлэлэри ыытыахтара, оттон руданы эһэр үлэлэри атын тэрилтэ ыытыаҕа.
Баҕалаах үлэһиттэри тэрилтэ «БелАЗ» массыынаҕа үлэлииргэ ирдэниллэр «С» категорияны ыларга Хаандыга б. хайа-геологическай техникумҥа босхо үөрэттэрэр.
Шахта производствоҕа директорын солбуйааччы Владимир Кожевников:
— Быйыл тиийэр чох саппааһа баар. Эһиилги чох 50 % бэлэмнэниллибитэ. Чоҕу аһаҕас хостооһуҥҥа күһүн көһүөхпүт. Онон уруккубут курдук республика 16 оройуонун чоҕунан хааччыйарга бэлэммит.
This post was published on 05.05.2016 17:18 17:18