Нам Фрунзе, Таастаах, Үөһээ Бүлүү Кырыкый, Уус Алдан Бээрийэ, Чурапчы Мэлдьэхси, Томпо Ударник, Охотскай Перевоз нэһилиэктэригэр уот 5 килэмиэтиртэн чугас умайар. Бу туһунан СИАҕа Ил Дархан, бырабыыталыстыба пресс-сулууспата иһитиннэрэр.
Саха сирин үрдүнэн барыта 157 ойуур баһаар умайарыттан, 52-тин умуруораллар. Баһаардарга уопсайа 3971 киһи, 681 тиэхиникэ үлэлиирин туһунан, киэһээҥҥи брифиҥҥэ, бэҕэһээ, бастакы вице-премьер Дмитрий Садовников иһитиннэрбитэ.
Ойуур уотун бохсууга түөрт бөртөлүөт, киин уонна арҕаа улуустарга оҥоһуу ардаҕы ыҥырар сөмөлүөт үлэлииллэр. Бе-200 сөмөлүөттэр Дьокуускай аэропордугар көһөннөр, Нам баһаардарыгар үлэлиэхтэрэ. Итини таһынан киин, өрүс уҥуор, Бүлүү бөлөх улуустарыгар баар баһаардары үөһэттэн авиация көмөтүнэн кэтииллэр.
