Бүгүн Арассыыйаҕа — Ийэ күнэ (2020, сэтинньи бүтэһик баскыһыанньатыгар бэлиэтэнэр), ХНТ — Дойдулар ардыларынааҕы Палестина норуотун кытары биир санааланыы күнэ бэлиэтэнэллэр. Ол туһунан Бикипиэдьийэ суруйар.
Түбэлтэлэр
- 1899 — Испания саамай элбэх титуллаах футбол улууба — «Барселона» — олохтоммут.
- 1917 — (эргэ истиилинэн сэтинньи 15) Башкиир уобаластааҕы Шурота Башкурдистан территориальнай-национальнай автономиятын биллэрбит.
- 1945 — Югославия Хоруоллугун оннугар Югославия Социалистическай Федеративнай Өрөспүүбүлүкэтэ тэриллибит. Бу судаарыстыбаны өр кэмҥэ Иосип Броз Тито диэн сэрии кэминээҕи бартыһаан басхана салайбыта. 1992 сыллаахха Югославия ыһыллыбыта.
- 1947 — ХНТ Генеральнай Ассамблеята Палестинаны дьэбириэй уонна араб судаарыстыбаларыгар араарар былааны ылыммыт. Бу былааны дьэбириэйдэр ылыммыттар, оттон арабтар утарбыттар. Инньэ гынан бастакы араб-дьэбириэй сэриитэ саҕаламмыт. Билиҥҥи туругунан Палестинаҕа дьэбириэй судаарыстыбата баар, онтон араб судаарыстыба ситэ тэриллибэккэ турар.
- 1980 — Бааск омуктар бастакы Коррика диэн ааттаах сүүрүүлэрэ саҕаламмыт. Бу тылларын өйүүргэ анаан икки сыл аайы тэрийэр хас да хонуктаах эстафеталара.
- 2006 — Нуучча бикипиэдьийэтэ «Рунет Бириэмийэтин» ылбыт.
- 2014 — Дьокуускайга Мас тардыһыытыгар бастакы аан дойду чемпионата саҕаламмыт. Чемпионакка уопсайа 35 дойдуттан 170 спортсмен кыттыбыт.
Төрөөбүттэр
- 1904 — Серафим Кулачиков — Эллэй — Саха норуодунай бэйиэтэ, Аҕа дойду Улуу сэриитин кыттыылааҕа.
- 1935 — Степан Емельянов — 1983-1998 сылларга Саха тыйаатырын дириэктэрэ, Саха Өрөспүүбүлүкэтин үтүөлээх артыыһа.
This post was published on 29.11.2020 09:01 09:01