Саха сиригэр уопсай үөрэхтээһин систиэмэтигэр кадр боппуруостарын быһаарыыга туһуламмыт «Сетевой учитель» пилотнай бырайыак кэҥиэҕэ. Тустаах сорудаҕы Ил Дархан Айсен Николаев үөрэх уонна наука үлэһиттэрин тохсунньутааҕы мунньаҕар тыл этэригэр биэрдэ. Ол туһунан www.sakha.gov.ru сайт суруйар.
«Сетевой учитель» пилотнай бырайыак ааспыт сыл балаҕан ыйыгар саҕаламмыта уонна билиҥҥитэ Өлүөхүмэ, Сунтаар, Уус Алдан уонна Бүлүү улуустарын 12 оскуолаларын хабар. 7 — 9 кылаас үөрэнээччилэригэр физикаҕа, химияҕа уонна биологияҕа квалификациялаах педагогтар тиийбэттэрин быһаарыыга туһуланар. Бырайыак үөрэх тэрилтэлэригэр предметтэри цифровой технологиялары туһанан ыытыыга олоҕурар.
Айсен Николаев бырайыак апробациятын түргэтэтии уонна географиятын кэҥэтии наадатын тоһоҕолоон бэлиэтээтэ.
“Үөрэх уонна наука министиэристибэтэ муниципалитеттары кытта бииргэ бырайыагы боруобалааһыны түргэтэтэргитигэр уонна предметник-учууталлар тиийбэт тыа уонна кыра комплектаах оскуолалары хабыыны хааччыйаргытыгар көрдөһөбүн», – диэн регион баһылыга бэлиэтээтэ.
Баһылык итини сэргэ Саха сирин үөрэҕириитин тиһигэр ситиспит цифровой таһымҥа болҕомтотун уурда, бу аныгы үөрэх киэптэрин киллэрэргэ уонна эбии үөрэҕи кэҥэтэргэ кыаҕы биэрэрин эттэ. Кини этэринэн, цифровизация учууталлар профессиональнай сайдыыларыгар эмиэ саҥа инструменнары арыйар.
Чуолаан, искусственнай интеллект технологияларыгар олоҕурбут «Цифровой ассистент преподавателя» сервискэ өрөспүүбүлүкэ араас оройуоннарыттан 1 200-тэн тахса учуутал холбоспута биллэр.
«Педагогтары көҕүлээһин, кинилэргэ цифровой сервистары туһанарга усулуобуйа тэрийии — билигин үөрэҕириини тэрийээччилэр биир тутаах соруктара», — диэн Айсен Николаев тоһоҕолоон бэлиэтээтэ.
This post was published on 22.01.2026 17:03 17:03