Саха сирин бырабыыталыстыбата сэрии сылларын оҕолоругар анаммыт сокуон барылын кэҥэтэр соруктаах. Ол туһунан былаас уоргана Дьокуускайга ыыппыт отчуотун кэмигэр биллэрэн турардаах.
Бырабыыталыстыба бэрэссэдээтэлин солбуйааччы Алексей Дьячковскай социальнай чэпчэтиинэн туһанар бырааптаах дьон категориятын элбэтиигэ билигин үлэ бара турарын эттэ.
«Биллэн турар, тыылга төрөппүттэрин сүтэрбит сэрии тулаайахтарын эбии киллэрэн биэриэхпит. Сокуон сэрии сылларын оҕолоругар ананыаҕа», — диэтэ кини.
Бырабыыталыстыба бэрэссэдэттэлэ Галина Данчикова экономическай быһыыттан-майгыттан тутулуктанан эбии социальнай эбэһээтэлистибэлэри ситэриилээх былаас былааннаабатын, ол эрээри соҕотох олорор, көмөҕө наадыйар дьоҥҥо өйөбүл оҥоһуллуон сөбүн эттэ.
Үлэ, социальнай сайдыы миниистирин бастакы солбуйааччы Светлана Сырова кырдьаҕастарга туһаайылылбыт кэлимсэ миэрэлэр ылыллыбыттарын ойуччу тутан эттэ. Холобур, ииттинэн олоруу алын кээмэйиттэн намыһах пенсиялаах аҕамсыйбыт дьоҥҥо регионнааҕы социальнай эбии төлөбүр баарын ыйда. 70 саастарын туолбуттарга эмиэ маннык төлөбүр оҥоһулларын кини эттэ. Уустук быһыыга-майгыга ыктарбыт дьоҥҥо аадырыстаммыт тус сыаллаах көмө бэриллэр.
This post was published on 21.03.2016 21:53 21:53