СӨ Роспотребнадзор управлениета бэс ыйын 22 күнүнээҕи чахчынан, клещкэ 121 киһи ытыттарбытын туһунан иһитиннэрэр.
—Алдаҥҥа, Ленскэйгэ, Нерюнгрига, Өлүөхүмэҕэ, Горнайга, Сунтаарга, Хаҥаласка уонна Дьокуускайга клещкэ ытыттарбыт дьон балыыһаҕа тута көрдөрбүттэр. Итинтэн сылтахтанан ыалдьыы баара билиҥҥитэ суоҕун туһунан суруллар.
Дьону-сэргэни харыстаан, элбэх киһи мустар, сынньанар сиригэр, оҕону чэбдигирдэр лааҕырдарга акарициднай үлэлэр ыытыллаллар. Оннук үлэнэн билиҥҥитэ 46 163 гектар, ол иһигэр оҕолору чэбдигирдэр лааҕырдарга 31,015 гектар сир-уот хабылынна.
Роспотребнадзор иһитиннэрэринэн, өрөспүүбүлүкэҕэ клещ вируснай энцефалитын утары быһыыны 5,5 тыһ. тахса киһи ылбыт.
Клещкэ ытыттарбыт киһи тута олохтоох балыыһатыгар эбэтэр травмпууҥҥа тиийэригэр, итиэннэ ытырбыт үөнү анаалыска хаалларарыгар сүбэлииллэр.
Харыстаныҥ! Сэрэхтээх, болҕомтолоох буолуҥ. Бэйэҕитин, оҕоҕутун-уруугутун көрө-истэ сылдьыҥ!
