Бэҕэһээ, олунньу 13 күнүгэр, Дьокуускай куорат үлэ бибилэтиэкэтигэр «Алфавит Новгородова: из прошлого в будущее» көрсүһүү буолла.
Suluschan дизайн-устуудьуйа, ХИФУ сурукка-бичиккэ музейа уонна SAQA OMUK таҥас брендэ истээччилэргэ алпаабыт историятын, аныгы интерпретациятын уонна саха бэлиитигэ уонна лингвиһэ Семен Новгородов нэһилиэстибэтин кэпсээтилэр.
Suluschan устуудьуйа креативнай дириэктэрэ Александра Захарова эппитинэн, быйыл төрөөбүт тыл уонна сурук-бичик тэрээһин ыытарга былааннаммыттар. Кинилэргэ SAQA OMUK таҥас брендэ кыттыбыт.
«Саха алпаабытын туһунан кэпсэппиппит, уратытын, суруллуутун, көстүүтүн. Сурук-бичик музейын сотрудниктара Семён Новогородов алпаабытын варианын туһунан кэпсээбиттэрэ. Биһиги уонна SAQA OMUK Новгородов буукубаларын бырайыактарбытыгар туттар туһунан эппиппит. Саха норуотун култууратын киэҥ эйгэҕэ таһаарар уонна дизайн, иллюстрация уонна графика көмөтүнэн нэһилиэстибэни харыстыыр үлэлээхпит. 2022 сыллаахха, өрөспүүбүлүкэ сүүс сылыгар, Новгородов 1929 сыллааҕы буукубаарыттан шрибин хатылаабыппыт. Ол билигин биһиги бородууксуйаларбытыгар туттуллар: аккырыыккаларга уонна өс хоһооннордоох стикерпактарга»,
— диэтэ Александра Захарова.
This post was published on 14.02.2025 10:08 10:08