Томпоттон Евдокия Неустроева СИА-ҕа суруйарынан, 2026-2028 сылларга Сэбиэскэй Союз Геройа Федор Матвеевич Охлопков Кириэс-Халдьаайы сэлиэнньэтигэр олорбут дьиэтигэр хапытаалынай өрөмүөн ыытыахтара.
Бу дьиэ Ф.М. Охлопков Герой буолбут сылыгар — 1965 сыллаахха — тутуллубут. Манна кини дьиэ кэргэнин кытта олоҕун тиһэх күннэригэр диэри олорбут. Ити 1968 сыл ыам ыйын 28 күнэ. Огдообото, Герой-ийэ Анна Николаевна оҕолорун кытта бу дьиэҕэ 1983 сыллаахха диэри олорбуттара.
Хаартыска: Евдокия Неустроева тиксэриитэ
Герой дьиэтигэр өрөмүөн үлэтэ «Семья» национальнай бырайыак «Семейные ценности и инфраструктура культуры (Культура для семьи)» федеральнайдааҕы бырайыак чэрчитинэн быйыл саҕаланыаҕа уонна 2028 сылга түмүктэнэрэ былааннаммыт. Көрүллүбүт үп уопсай суумата 16658479 солк., ол иһигэр федеральнайдааҕы бүддьүөттэн — 15825555 солк.
