Кэнники биэс сылга, Намныыр суол 14-с км сытар, “Саталга” балтараа тыһыынчаттан тахса уһаайба сирэ үллэриллэн, Саха сирин араас улуустарыттан көһөн кэлбит, ону тэҥэ сибиэһэй салгынынан тыыныан, чааһынай дьиэ туттуон баҕалаах дьон уһаайба атыылаһан, быйыл 180-ча ыал кыстаата.
Куораттан син тэйиччи эрээри, үлэ, үөрэх дьоно күн аайы ким автобуһунан, ким массыынатынан хас сарсыарда аайы тиэтэйэ-саарайа куоракка киирэллэр. Сахабыт сирин тымныы кыһына түмүктэнэн, халлаан сырдаан, күн уһаан, билигин”Сатал” олохтоохторо дьиэ-уот, ким гараж, баанньык туттар былдьаһыктаах күннэрэ үүннүлэр. Онон устуруус, уһанар тыас сарсыардаттан өрүһүспүттүү күнү саҕалыыр.
Ыам ыйын –“ Саталлар” бэрт сэргэхтик көрүстүлэр. Ол курдук, уопсайа 5 кварталынан тэнийэн олорор олохтоохтор, хамаанда туруоран, “Көрдөөх стартар”, “Городки”, лапта, волейбол түһүлгэтигэр муһуннулар.
Уопсайа 4 хамаанда тыҥааһыннаах киирсиитин түмүгүнэн, кыайыылаахтар сэмэй бэлэхтэринэн наҕараадаланнылар. Маннык күөх маайы көрсүү бырааһынньыгын тэрийээччитинэн, М.К.Аммосов аатынан ХИФУ иһинэн үлэлиир, физкультурнай-спортивнай кулууп салаайааччыта, 1 квартал олохтооҕо Прокопий Андросов буолла. Маай, спорт бырааһынньыгар мустубут олохтоохтор илдьэ кэлбит минньигэс астарынан остуол тардан, кэлбит ыалдьыт итии чэй иһэн, үссэнэн, төһө да, тымныы тыаллаах күн буолбутун билбэккэ хааллылар. Оҕолуун-кырдьаҕастыын хойукка диэри лапталаан,олохторун биир күнүн бэрт сэргэхтик атаардылар.
Түмүккэ, мустубут дьон, “Саталга” элбэх эдэр ыал олорорунан, оҕо площадкатын уонна волейболлуурга анал миэстэни толкуйдуур туһунан этии киллэрдилэр. Энтузиаст тэрийээччигэ, П.П.Андросовка, махталларын биллэрдилэр, инникитин даҕаны түмсүүлээх буоларга ыҥырдылар.
This post was published on 05.05.2016 14:16 14:16