«Якутия» серийнэй атомнай ледокола Мурманскай пуордугар кэлэн, бастакы оробуочай рейскэ тахсарга бэлэмнэнэр, суруйда Саха сирэ саайт.
«Муус устар 15 күнүгэр суудуна бастакы оробуочай рейсигэр тахсыа диэн былаанныыбыт. Ледокол экипаһа Енисей оройуонунан Карскай байҕалга үлэлиэҕэ», — диэтэ «Атомфлот» ФГУП генеральнай дириэктэрин э.т. Яков Антонов.
Билигин хотугулуу-илин акваторияҕа муус турар кэмэ бүтэн эрэр. Онон, бастакы оробуочай рейсигэр атомоход бэйэтин тэхиниичэскэй өттүнэн кыаҕын көрдөрүөҕэ. Атомоход Балтийскай байҕалтан сырыытын муус устар 6 күнүттэн саҕалаабыта. Ледокол Атлантиканы ааспыта уонна Кольскай заливка киирэн тохтообута.
«Якутия» универсальнай атомнай ледоход 22220 бырайыак төрдүс суудуна. Тутуута 2020 сыл ыам ыйыттан саҕаланан, 2022 сыл сэтинньитигэр ууга түһэрбиттэрэ. 22220 бырайыагынан билигин «Чукотка» уонна «Ленинград» атомоходтары туталлар.
This post was published on 14.04.2025 17:03 17:03