7 Алтынньы 07.10
  • -4°
  • $ 60,25
  • 58,24

Сардана Трофимова Саха сирин норуоттарын оонньууларыгар үс дистанцияҕа сүүрүөҕэ

Марафоҥҥа Россия биэс төгүллээх чемпионката Сардана Трофимова Саха сирин норуоттарын VIII спортивнай оонньууларыгар үс дистанцияҕа сүүрүөҕэ. Спартакиада Уус Алдан улууһугар от ыйын 4 күнүгэр стартыаҕа. Сардаана Трофимова Үөһээ Бүлүү улууһун аатыттан киириэҕэ, суруйар СИА.

«Биэс, үс км уонна 800 м эстафетаҕа сүүрэбин. Мин марафонецпын, үс уонна биэс км — мин дистанцияларым буолбатахтар, ол иһин бэлэмнэниим былааныгар уларытыылары киллэрдим. Сүүрэр суолга бэлэмнэнии — умнуллубут да курдук. Бүтэһигин Аммаҕа сүүрбүтүм. Маннык тренировкалар былчыҥҥа олох атын көрдөрүүнү биэрэллэр. Ити эрээри бэлэмнэниим үчүгэй диэхпин наада. Утарсааччыларым күүстээхтэр, сүүрэр суол көрдөрүөҕэ ким бастыҥ буоларын», — диэн кэпсээтэ СИА-ҕа Сардана Трофимова.

Сардана Трофимова сверхмарафоҥҥа аан дойду үс төгүллээх чемпионката Татьяна Жиркова бөлөҕөр дьарыктанар. Кини 1996 сыллаахха, эмиэ Уус Алдаҥҥа ыытыллыбыт, I спортивнай оонньууларга кыайбыта.

Сардананы сэргэ Жиркова иитиллээччилэриттэн оонньууларга барыахтара: Дьулустан Елисеев, Роман Алексеев, Константин Драгунов, Дмитрий Степанов, Петр Захаров, Саргылана Флегонтова, Надежда Бут, Изабелла Борисова, Алена Татаринова, Пелагея Григорьева. Бары тус-туспа хамаандаттан киириэхтэрэ.

Хаартыска: Дьулустаан Сергеев, СИА.

Следите за самым важным и интересным в Telegram-канале и WhatsApp-группе ЯСИА
0
0