Саха сирин чэпчэки атлетикикаҕа спортсменката Арассыыйа марафонун 5 төгүллээх чемпионката Киргизия сүүмэрдэммит хамаандатыгар киирдэ. Спортивнай гражданство уларыйыытын Бүтүн Арассыыйатааҕы чэпчэки атлетика (ВФЛА) федерациятын Президиума бигэргэттэ, диэн ВФЛА бэрэсэдьиэнин эбээһинэһин толорооччу Ирина Приваловаҕа сигэнэн ТАСС иһитиннэрдэ.
«Президиум тиһэх мунньаҕар Сардаана Трофимова Киргизия сүүмэрдэммит хамаандатыгар көһүүтүн бигэргэттэ», — диэтэ Привалова.
Спортсменка (World Athletics) күрэхтэһиигэ кыттарга норуоттар икки ардыларынааҕы чэпчэки атлетическай федерациятан көҥүл ылыахтаах. Ону таһынан, 2024 сыллаахха Париж куоракка буолуохтаах олимпийскай оонньууларга Киргизия сүүмэрдэммит хамаандатын састаабыгар киирэн кыттарга аан дойдутааҕы олимпийскай кэмитиэт көҥүлүн ылыахтаах.
Санатан эттэххэ, от ыйын саҥатыгар Трофимова Киргизия гражданствотын ылбытын туһунан иһитиннэрбитэ.
This post was published on 11.08.2022 16:03 16:03