Мас тардыһыытыгар Грузия Батуми куоратыгар ыытыллыбыт Европа чемпионатыгар Таатта улууһун Ытык-Күөл сэлиэнньэтигэр 1-кы №-дээх баһаарынай сулууспаҕа диспетчеринэн үлэлиир Сардаана Осипова кыайыы көтөллөммүтэ. Бииргэ үлэлиир дьоно кинини эҕэрдэлээтилэр уонна өссө үрдүк ситиһиилэри, чыпчааллары баҕардылар.
Мас тардыһыытын бу түһүлгэтигэр аан дойду 10 араас муннугуттан чулуу спортсменнар кыттыбыттарын кини бииргэ үлэлиир дьоно этэллэр.
«Түөрт күөн көрсүүгэ кини күүстээх утарсааччылары кыайда», — диэн киэн тутта кэпсииллэр.
Күрэхтэһии туһунан Сардаана Осипова бэйэтэ маннык диир: «Мин ыйааһыммар уопсайа сэттэ буолан киирсибиппит. Бастакы эргииргэ Украина бэрэстэбиитэлин 2:0 ахсаанынан хоппутум. Онтон кэлэргэ эмиэ бу дойду спортсменын 2:0 ахсаанынан кыайбытым. Ол кэнниттэн Анна Неустроеваны кытта эрийсиилээхтик киирсэммин, кыайыы көтөллөммүтүм. Ахсаан 2:0 этэ. Онтон Грузия Инга Чакветадзены кытта тардыспытым уонна эмиэ 2:0 ахсаанынан кыайбытым».
Сардаана бу иннинээҕи күрэхтэһиилэртэн элбэх наҕараадалардаах. Кини мас -реслиҥҥэ Россия спордун маастара, көҥүл тустууга маастарга кандидат, чэпчэки атлетикаҕа бастакы спортивнай разрядтаах, бу көрүҥҥэ өрөспүүбүлүкэ хас да төгүллээх чөмпүйүөнэ уонна призера. Красноярскай кыраай Ачинск куоратыгар ыытыллыбыт ини-бии Алексеевтар бириистэригэр боруонса мэтээли ылбыта, дьахталлар тустууларын Россиятааҕы чемпионаттарын кыттыылааҕа, Уһук Илиҥҥи баһаарынай сулууспалар чемпионаттарыгар үрүҥ көмүс мэтээли ылбыта, мас-реслиҥҥэ Саха сирин уонна Россия чемпионаттарын үрүҥ көмүс призера.
This post was published on 23.08.2016 16:33 16:33