Муус устар 27 күнүгэр Санкт-Петербурга Саха Өрөспүүбүлүкэтин күнэ өрө күүрүүлээхтик бэлиэтэннэ. Ол курдук бу бэлиэ күн дойдубут култуурунай киинигэр олорор биир дойдулаахтар улахан кэнсиэргэ тоҕуоруһа муһуннулар.
Тэрээһини көҕүлээччинэн уонна салайан ыытааччынан суруналыыс Оксана Жиркова буолла. Бырааһынньыктааҕы айар киэһэ Дойду президенин иһинэн Саха Өрөспүүбүлүкэтин бастайааннай бэрэстэбиитэлистибэтин уонна Санкт-Петербург куорат Выборгскай оройуонун дьаһалтатын өйөбүллэринэн тэрилиннэ.
Манна сүрүн ыалдьыттарынан анал байыаннай дьайыыга оһоллонон, Петербург госпиталларыгар эмтэнэ сытар саха буойуттара буоллулар.
Биир дойдулаахтар көрсүһүүлэрэ Дойду уонна Саха сирин өрөгөй ырыаларынан саҕаланна. Саалаҕа толору мустубут дьон сүһүөхтэригэр туран бу күнү уруйдаатылар.
Салгыы эҕэрдэ тыл СӨ бастайааннай бэрэстэбиитэлин солбуйааччытыгар Евгений Петровка бэрилиннэ. Кини быйылгы сыл Аҕа дойдуну көмүскүүр Улуу сэриигэ Кыайыы 80 сыллаах үбүлүөйүгэр сөп түбэспитэ ураты суолталааҕын бэлиэтээтэ.
Бу күһүн Улуу Новгород сиригэр-уотугар саха буойуттарыгар аналлаах улахан мемориал туруоруллуохтааҕын туһунан иһитиннэрдэ. Ону кытта билигин дойду иһин олохторун харыстаабакка туруулуһа сылдьар саллааттарга уонна бу киэһэ кэлбит анал байыаннай дьайыы кыттыылаахтарыгар махталын биллэрдэ.
Бэйэлэрин эҕэрдэлэрин куорат Выборгскай оройуонун дьаһалтатын баһылыга Виктор Полунин, “Саха — Санкт-Петербург” биир дойдулаахтар түмсүүлэрин бэрэссэдээтэлэ Гаврил Троев, Бурятия, Тыва, Калмыкия бэрэстэбиитэллэрэ уонна саха буойуна эттилэр.
Атын өрөспүүбүлүкэ олохтоохторо, омуктара бу дьоро киэһэ сахалары ытыктаан, кинилэр үөрүүлэрин тэҥҥэ үллэһиннилэр. Бу мээнэҕэ буолбатах. Чуолаан билигин буола турар быһыыга-майгыга омугунан арахсыбакка, бары бырааттыы курдук тутуһа, өйөнсө сылдьалларын бэлиэтэ буолар.
Онон айар киэһэҕэ араас омук ырыата дьиэрэйдэ, үҥкүүтэ толорулунна. Ураты нүөмэринэн Ленинградскай уобалас Парголово куоратыттан бэтэрээннэр хордара буолла. Ол курдук нуучча далбардара “Сайын” норуот ырыатын сахалыы толорон сөхтөрдүлэр. Бу буолар — улуу Россия киэлитигэр араас омуктар аны күҥҥэ диэри иллээхтик олороллорун, ытыктаһалларын бэлиэтэ.
Саха Өрөспүүбүлүкэтин күнэ Санкт-Петербурга оһуохайынан түмүктэннэ. Кэлбит дьону төрүт үҥкүү тула СӨ култууратын туйгуна, фольклорист Варвара Обоюкова түмэ тарта. Онон бу тэрээһиҥҥэ мустааччылар Сахабыт сириттэн ыраах курдук санаммакка, дойдубутугар сылдьар курдук сананныбыт.
Ааптар: Анфиса Слепцова, РФ суруналыыстарын сойууһун чилиэнэ, Санкт-Петербург к.
This post was published on 28.04.2025 14:03 14:03