15 От ыйа 15.07
  • 22°
  • $ 87,74
  • 95,76

Санкт-Петербурга олорор сахалар Семен Новгородов уҥуоҕар сибэкки уурдулар

15:55, 14 февраля 2021
Текст:
Читайте нас на
Яндекс Новости
ЯДВ

Санкт-Петербург куоракка саха төрүт тылын уонна суругун-бичигин төрүттээччи Семен Андреевич Новгородов сырдык аатыгар сүгүрүйдүлэр. Олунньу 13 күнүгэр кини уҥуоҕар тыыннаах сибэкки дьөрбөтө уурулунна.


Саха норуота омук быһыытынан Россияҕа, салгыы аан дойдуга билиниллэригэр саха интеллигенциятын биир чаҕылхай бэрэстэбиитэлэ, тыл үөрэхтээҕэ Семен Новгородов киллэрбит кылаата үйэлэргэ умнуллубат.

Кини аата үйэтитиллэрин туһугар Саха Өрөспүүбүлүкэтин бастакы президенэ Михаил Николаев учуонай-лингвист төрөөбүт күнүгэр сөп түбэһиннэрэн, 1996 сылтан төрөөбүт төрүт тыл уонна сурук-бичик күнэ бэлиэтэнэр буолбута. Ол сыл Михаил Ефимович көҕүлээһининэн, Санкт-Петербурга Смоленскай кылабыыһаҕа Семен Новгородов көмүллэ сытар миэстэтин чөлүгэр түһэрии үлэтэ ыытыллыбыта. Билигин манна саха норуотун чулуу уолун сырдык мөссүөнэ анал бэлиэҕэ үйэтитиллэн турар.

Петербурга олорор биир дойдулаахтар түмсэн, ытык сиргэ тиийэн, Семен Андреевич сырдык аатыгар сүгүрүйдүлэр. Өйдөбүнньүк тэрээһиҥҥэ Дьокуускайтан Кадетскай оскуола-интэринээт иитиллээччилэрэ кэлэн кыттыбыттара өссө суолталаах буолла. Төрөөбүт дойдубут историятын оҥорсубут, сахабыт тылын сурукка түһэрэн үйэтиппит Семен Новгородов көмүс уҥуоҕар кэлэн бэйэ суолун хаалларыы — умнуллубат сүдү түгэн буоларын РФ президенин иһинэн Саха Өрөспүүбүлүкэтин бастайааннай бэрэстэбиитэлин солбуйааччыта Юрий Кравцов тоһоҕолоон бэлиэтээтэ.

Кадет оҕолор бүтүн Россиятааҕы «Молодые интеллектуалы России 2021» тэрээһиннэригэр кыттан, бастакы миэстэни ылан дойдуларыгар төннөн эрэллэрин киэн тутта кэпсиибит.

«Төрөөбүт тылбыт күнүн ситэрэн биэрэн, биир дойдулаахтар сахалыы дьыктаан суруйуутугар кытынныбыт. Саха норуодунай суруйааччыта, биллиилээх прозаик Далан “Үрэх баһын үһүйээнэ” айымньытыттан быһа тардан ааҕылынна. Суруйуу түмүгүнэн кыайыылаахтар быһаарылыннылар. Маҥнайгы миэстэни Амма улууһуттан кэлэ сылдьар Марфа Нестерева, иккис миэстэни устудьуон Артур Скрябин, үһүс миэстэни устудьуон Максим Аммосов ылан, Бастайааннай бэрэстэбиитэлистибэ олохтообут сыаналаах бэлэхтэринэн бэлиэтэннилэр. Бу курдук төрөөбүт тыл уонна сурук-бичик күнэ ыраах Санкт-Петербург куоракка умнуллубаттык бэлиэтэннэ«, — диэн СИА-ҕа иһитиннэрдэ Анфиса Слепцова, РФ суруналыыстарын сойууһун чилиэнэ.

Следите за самым важным и интересным в Telegram-канале и WhatsApp-группе ЯСИА