Икки тыһыынчаттан тахса ыарыһаҕы Сангаар дэриэбинэтигэр тутуллубут саҥа поликлиника тоҕус үлэ күнүгэр көрдө. Бу туһунан Кэбээйи улууһугар Саха сирин бырабыыталыстыбатын отчуотугар иһитиннэрдилэр.
Эбийиэк РФ президенэ Владимир Путин көҕүлээбит «Доруобуйа харыстабыла» национальнай бырайыагын чэрчитинэн тутуллубута. Билигин бу национальнай бырайыак соруктарын «Уһун уонна көхтөөх олох» национальнай бырайыак салгыыр.
Маны таһынан Кэбээйи улууһугар өрөспүүбүлүкэ инвестбырагырааматын чэрчитинэн Кэбээйи сэлиэнньэтигэр 2025 сыллаахха 140 миэстэлээх «Мичээр» оҕо саадын саҥа таас дьиэтин киллэрбиттэрэ. Урут ити бырагырааманан «Үөрэхтээһин» национальнай бырайыагы кытта дьүөрэлэһиигэ Сайылык сэлиэнньэтигэр 275 миэстэлээх оскуола тутуллубута.
Саха сирин бырабыыталыстыбатын бэрэссэдээтэлин солбуйааччы Сергей Местников Батамай, Сиэгэн-Күөл уонна Сэбээн-Күөл сэлиэнньэлэрин олохтоохторун кытта көрсүһүүлэр түмүктэрин ырытан туран, нэһилиэнньэ үрдүк көхтөөх буолуутун бэлиэтээтэ. Кини этэринэн, биир сүрүн боппуруоһунан улуус уонна өрөспүүбүлүкэ социальнай-экономическай сайдыытыгар бырамыысыланнас хампаанньалара кыттыылара буолла.
«Олохтоохтору суолу-ииһи тупсарыыга, пассажирдары таһыыга, табаны иитиини сайыннарыыга сыһыаннаах боппуруостар, олорор дьиэ-хомунаалынай хаһаайыстыба, экология боппуруостара интэриэһиргэтэр. Кинилэргэ эппиэттэри биэрдибит, ыйытыылары үлэҕэ ыллыбыт», — диэн Местников эбэн эттэ.
Тыайа нэһилиэгэр Саха сирин Госкомюстициятын бэрэстээтэлэ Павел Иванов салайааччылаах хос бөлөх үлэлээтэ. Онно дьүүллэһии сүрүн тиэмэлэринэн эдэр кадрдарга олорор дьиэни тутуу, «Лүчү» суолу оҥоруу уонна Луҥха өрүһү туоруур муостаны тутуу буоллулар.
Мукучу, Лүксүгүн, Арыктаах, Чагда уонна Кэбээйи сэлиэнньэлэргэ көрсүһүүлэри култуура уонна духуобунай сайдыы миниистирин Афанасий Ноев бөлөҕө ыытта. Олоҥхо ыһыаҕар бэлэмнэниигэ ураты болҕомто уурулунна.
Саха сирин бырабыыталыстыбатын көһө сылдьар отчуоттара кулун тутар ыйга бүтэллэрэ былааннанар, онтон түмүктэри «Саха» НКИХ телерадиовещание ханаалларыгар таһаарыахтара.
This post was published on 12.02.2026 11:03 11:03