Чурапчы нэһилиэгиттэн үс көстөн ордук тэйиччи сытар Кыйы бөһүөлэгэр, Матвей Турнин аатынан Тыараһа орто оскуолатыгар “Саллаат паартата” аахсыйа салгыы ыытылынна.
Бойобуой дьайыы бэтэрээнэ, Чечня I-кы хампаанньатын кыттыылааҕа, Чурапчыны икки төрөөбүт дойду оҥостон оҕо-уруу тэнитэн, бу соторутааҕыта биһиги кэккэбититтэн туораабыт, Кыйы бөһүөлэгиттэн төрүттээх
Романов Андриан Федотович кэриэһигэр, үөрэммит, иитиллибит оскуолатыгар паартата туруорулунна.
Тэрээһин үөрүүлээх чааһыгар Таатта уонна Чурапчы улууһун байыаннай хамыһаара, майор Петр Никифоров,
Чурапчы улууһун бойобуой дьайыы бэтэрээннэрин Сэбиэтин бэрэссэдээтэлин солбуйааччы Семен Жендринскэй, бойобуой дьайыы бэтэрээннэрэ Иннокентий Варламов, Олег Оконешников, Андриан олоҕун аргыһа Екатерина Романова,
төрөппүт улахан уола Виталий, бииргэ төрөөбүт эдьиийдэрэ Галина Халыева, Фаина Собакина, таайа Петр Чехордун кыттыыны ыллылар.
“Чурапчы улууһун бойобуой дьайыы бэтэрээннэрин Сэбиэтигэр биир бэйэм улаханнык махтанабын. Чурапчыга Андриаммыт тиһэх суолугар бара сылдьыбытым, онно эмиэ сүрдээх тэрээһиннээххитин көрдөрбүккүт. Эһиги бэйэҕит саллааттарыгытын, бойобуой табаарыстаргытын куруук умнубаккытыттан улаханнык астынабын. Өрөспүүбүлүкэҕэ даҕаны арааһа бу маннык тэрээһиннээх, Чурапчылар курдук дьоннор суохтара буолуо дии саныыбын. Онтон паарта туһунан эттэххэ, бу паартаҕа хайаан даҕаны үөрэҕэр, успуорка улахан ситиһиилээх оҕо олорон үөрэниэхтээх, урукку кэмҥэ “Ильич паартата” диэн баар буолара, ол онно үөрэх бастыҥнара эрэ олорор чиэскэ тиксэллэрэ. Онон бу дьоһуннаах хамсааһын саҕаламмытынан бука барыгытын итиитик-истиҥник эҕэрдэлиибин”, — диэн өр сылларга оскуолаҕа математика учууталынан, дириэктэринэн үлэлээбит, Андриан таайа Петр Петрович дьоһуннаах тыллары эттэ.
“Андриан биһиги дьиэ кэргэҥҥэ тохсус оҕо этэ, мин бэһис оҕобун. Ону бырааппын сэриигэ ыыппыттарын истэн бараммын, наһаа улаханнык долгуйдум. Оччотооҕу төлөпүөн диэн суох, Андриан суруйбут суруга 30 күнү быһа Чечняттан айаннаан кэлэрэ. Онно биир суруга мин өйбөр букатыннаахтыы хаалан хаалбыт… Наһаа эргэ таанкалар, ол эргэ таанкалары барытын мин өрөмүөннүүбүн. Саллааттар ол таанкаларынан сэриилэһэ бараллар. Миэхэ бэйэбэр саамай куһаҕан таанка түбэстэ, ону мин уон сэриигэ киирэн бараммын, таанкам алдьанан хаалла… уонна тыыннаах ордубуппун. Оччолорго наһаа куттаммытым… ол кэнниттэн быраатым аҕыс ый сулуупалаан баран тыыннаах эргиллэн кэлбитэ. Кэлээт салгыы физкултуура учууталын идэтин баһылаан үлэлээбитэ, кэргэн ылан үс уол оҕоломмута. Онон быраатым уоттаах сэриигэ сылдьан кэлбит киһи буолар. Биир да кыраам уу суох диэбитин өйдүүбүн, тулам барыта өлбүт дьоннор диэбиттээҕэ”, — диэн Андриан бииргэ төрөөбүт эдьиийэ, Тыараһа орто оскуолатын алын сүһүөх кылаас учуутала Галина Федотовна ахтыы оҥордо.
Андриан Федотович олоҕун аргыһа Екатерина Васильевна бэйэтин кылгас ахтыытын оҥорон баран, Тыараһа орто оскуолатын мусуойугар Андриан бойобуой мэтээллэрин, грамоталарын, хаһыакка тахсыбыт ыстатыйаларын копиятын, оскуола дириэктэрэ Петр Полускиҥҥа туттарда.
Бастатан туран Чурапчы улууһун бойобуой дьайыы бэтэрээннэригэр дириҥ махталбытын тириэрдэбит.Улаатан эрэр оҕолорго патриотическай иитиигэ олус үчүгэй аахсыйаны тэрийбиттэр. Биһиги выпускнипыт Андриан Федотович маннык сэриигэ сылдьыбытын, оскуолабыт хас биирдии үөрэнээччилэрэ көрөннөр бэйэлэригэр сөптөөх быһаарыныыны оҥостуохтара дии саныыбыт. Байыаннай хамыһаар Петр Никифоров эппитин курдук, уолаттар аармыйа сулууспатыттан куттаныа суохтаахтык. Бу билигин буола турар байыаннай дьайыыга биһиги нэһилиэкпититтэн 9 ыччат кытта сылдьар, кинилэр ааттарын биһиги эмиэ умнуо суохтаахпыт. Бу паартаны учууталлар сүбэлэһэн бараннар, устуоруйа уонна обществознание кабинетыгар туруорга быһаардылар. Кабинет салайааччыта Уйгулаана Романова. Этэргэ дылы, “Саллаат паартатыгар” уолаттар эрэ олороллоро буолуо дии саныыбыт, инникитин саллаат буолааччылар, — диэн Тыараһа орто оскуолатын дириэктэрэ Петр Васильевич санаатын эттэ.
Ааптар: Семен Жендринскай, «Саҥа олох» хаһыат, Чурапчы улууһа
