Өлүөнэ муостаны тутуу Дирекциятын концедент бэрэстэбиитэллэрэ «РОСДОРНИИ» ФАУ тутуу хонтуруолун бэрэстэбиитэллэрин уонна «ВИС-Строй» ХЭО генеральнай бэдэрээтчитин кытта Өлүөнэ муостатын тутуутугар уочараттаах көрүүнү ыыттылар. Бу туһунан Саха сирин тырааныспарга пресс-сулууспата иһитиннэрэр.
Генеральнай бэдэрээтчит хас да хайысханан үлэни күүскэ ыытан иһэрин инспекция бигэргэттэ.
Вахтовай куораттары тутуу ыытыллар, буронабивной сыбаайалар арматурнай каркастара оҥоһуллаллар, 10 №- дээх тирэх коффердамын тимир-бетон билиитэтин бөҕөргөтүү оҥоһуллар.
5 №-дээх уонна 6 №-дээх тирэхтэр котлованнарын буорун оҥорууга үлэ барар. Ону сэргэ 10 №-дээх тирэх коффердамын туруоруутун учаастагар дириҥэтии бастакы түһүмэхтэрэ саҕаланнылар.
Кыһыҥҥы тыйыс күн-дьыл да буоллар, тутуу процестара кыраапык быһыытынан баран иһэллэр. -25 кыраадыс буоллаҕына, өрүс уҥа кытылыгар сири үүттүүр үлэ былааннанар.
Бүгүн тутуу былаһааккатыгар 150-ча исписэлиис уонна 20-чэ тутуу техниката үлэҕэ киирдэ. Сайын үлэһиттэр ахсааннара 400-кэҕэ тиийиэҕэ.
Санатан эттэххэ, Өлүөнэ муостата дойду президенэ Владимир Путин көҕүлээбит «Олох инфраструктурата» национальнай бырайыагынан тутуллар. Өлүөнэ муостатын тутуу бырайыага регион биир тутаах инфраструктуралаах эбийиэгинэн буолар уонна Саха сирин транспортнай инфраструктуратын сайыннарыыга көмөлөһөр.
This post was published on 22.01.2026 13:11 13:11