24 Олунньу 24.02
  • -37°
  • $ 92,75
  • 100,44

Сайылыкка "Кэбээйи фольклора" диэн саҥа кинигэ сүрэхтэннэ

15:01, 01 декабря 2023
Текст:
Хаартыска: "Дабаан" хаһыат саайта
Читайте нас на
Яндекс Новости
ЯДВ

Сайылык сиригэр-уотугар историческай суолталаах М.К. Аммосов аатынан ХИФУ Олоҥхону чинчийэр института бэлэмнээбит, Кэбээйи улууһун дьаһалтата үбүлээбит “Кэбээйи фольклора” диэн ааттаах кинигэ сүрэхтэниитэ үрдүк таһымнаахтык ааста.

Тэрээһиҥҥэ кинигэ тахсыытыгар үлэлэспит Олоҥхо институтун үлэһиттэрэ Р.Н. Анисимов, М.Т. Сатанар, С.Д. Львова ыалдьыт буоллулар, тэрээһин суолтатын үрдэтистилэр, «Дабаан» хаһыат суруйда.

Кинигэ ис тутулун кытта билсии, кинигэ тахсыытыгар үлэлэспит дьон ыллыктаах санааларын истии ыытылынна. 

Улуус талба талааннаахтарын быыстапката толору тардылынна. Тэрээһин алгыстаах арыллыытын кэннэ сыанаҕа “Кэбээйибин туойабын” диэн ааттаах дьүһүйүү дьон-сэргэ болҕомтотун тарта. Дьоро күн сүрүн көстүүтүнэн Мастаах нэһилиэгин олохтоохторун толоруутугар “Биэ уола Бэйбэлдьийэ тулаайах” олоҥхоттон быһа тардан толоруулара буолла.

“Үһүйээннэр уонна аныгы номохтор” диэн чаҕылхай ис хоһоонноох, сахалыы тыыннаах нэһилиэктэрин сырдатар көрдөрүүлэри туруордулар. Биһиги нэһилиэкпитин ааттаан-суоллаан, уустаан-ураннаан сырдатан кэпсээн баран,  Софья Николаевна Кобякова салайааччылаах  “Томтор” кооператив бэлэмнээбит кыынньар уохтаах кымыһынан, саҥардыы сэппэрээтэргэ сүүрдүллүбүт үрүҥ сөлөгөй сүөгэйинэн, сыалаах этинэн, сылгы хартатынан, толору кутуллубут хаанынан кэһии күндүлээтибит. Ону сэргэ, Ирина Кобякова салайааччылаах “Сайдам” фольклорнай бөлөхпүт кырыымпа кыҥкынас тыаһынан норуот ырыаларыгар композиция уонна эр дьон толорууларыгар “Татыйаас” диэн норуот ырыатын толорон, көрөөччүлэр биһирэбиллэрин ылан, үөрэн-көтөн кэллибит, диэн суруйдулар Кэбээйитээҕи “Сайдам” норуот айымньытын киинин уус-уран салайааччыта Ефросинья Кириллина, библиотекарь Светлана Оконешникова.

Следите за самым важным и интересным в Telegram-канале и WhatsApp-группе ЯСИА