21 Тохсунньу 21.01
  • -48°
  • $ 73,82
  • 83,32

Сахалыы гороскоп (муус устар 9-15 күннэрэ)

18:52, 10 апреля 2018
Текст:

ХОЙ. Бу күннэргэ бутуллубут дьыаланы кэбэҕэстик  быһаарыаҥ. Үп-харчы боппуруоһа тупсар. Ол эрээри, бырыһыаҥҥа уурдарарга тиэтэйимэ, иэс да биэримэ. Албыҥҥа-көлдьүҥҥэ киирэн биэриэххин сөп. Нэдиэлэ бүтүүтэ кыайыыгын-хотуугун, ситиһиигин кэпсээтэххинэ, дьон сэҥээриэ, сэргиэ. Ол үлэҕэр тирэх буолуо. Сынньалаҥҥын дьиэ кэргэҥҥэр анаа. Ол гынан баран, бэйэҕэр болҕомтоҕун уураргын умнума. Саҥа таҥаста-сапта ылын.

ОҔУС. Бу нэдиэлэ устатыгар тулуурдаах буоларыҥ, дьону-сэргэни кытары уопсай тылы буларыҥ наада. Кэллиэгэлэргин кытары үчүгэйдик сыһыаннастаххына, кинилэр тугу этэллэрин болҕомтолоохтук иһиттэххинэ, кэлин эйигин атыттарга үчүгэй холобур оҥоруохтара. Ол эрээри, ордугургуур, эйигин хомуруйан тыл-өс быраҕа сылдьар дьонтон сэрэн, тэйиччи тутун. Чэппиэргэ эбии харчы киириэ. Тапталгар үөрүү-көтүү күүтэр. Бу күннэргэ эйигинэ суох табыллыбаттарын туһунан этиэхтэрэ. Ол гынан баран, сыбыдаанньанан олорума. Өрөбүлгэр дьиэҕин өрө тардарыҥ ордук буолуо.

ИГИРЭЛЭР. Астрологтар эйиэхэ үчүгэй нэдиэлэ үммүт диэн билгэлииллэр. Күлүккэ сылдьыма, көхтөөх буол. Бэйэҥ санааҕын, сонун көрүүлэргин салалтаҕар тиэрдэн, этэн ис. Эйигин үрдүкү сололоох, биллэр-көстөр киһи сэргиэҕэ. Дьыалабыай кэпсэтии нэдиэлэ ортотугар буолара ордук. Ити кэмҥэ бу бэлиэҕэ төрөөбүттэр тыллара-өстөрө сытыырхайар, ылыннарыылаахтык саҥарар-иҥэрэр буолаллар диэн сулустар этэллэр. Итиэннэ бу кэми мүлчү туппаккар сүбэлииллэр. Ол гынан баран, төһө да түбүгүрбүтүҥ иһин, чугас дьоҥҥун умнума, болҕомтоҕун уур.

АРААК. Бириэмэҕин сатаан аттарарга кыһалын. Үлэҕин, сынньалаҥҥын сөпкө көрөн туруортаа. Нэдиэлэ саҥата үлэҕэр ситиһиилэниэҥ. Үп-харчы да боппуруоһа тупсар. Кэргэнэ суохтары нэдиэлэ бүтүүтэ саҥа билсиһии күүтэр. Онон өрөбүллэргин сыта-тура былаанныы сырыт. Ол гынан баран, дьиэҕэр баар чугас дьоҥҥун таһы быһа умнума. Кинилэр эн болҕомтоҕор наадыйаллар. Кыра кэһии тутан тиийэргин умнума. Ордук оҕоҕо бэлэх оҥордоххуна, чугас дьоҥҥун үөрдүөҥ. Ол эйиэхэ улахан күүһү, сэниэни биэриэ. Онтон оҕолоох-уруулаах, ыал буолбут дьон өрөбүллэргитигэр дьиэҕитигэр, дьоҥҥутугар көмөлөһүҥ диэн астрологтар этэллэр. Бу бэлиэҕэ төрөөбүттэр доруобуйаларын көрүнэ сылдьалларыгар сүбэлииллэр.

ХАХАЙ. Тугу барытын чэпчэкитик ылын, кыыһыран-тымтан барыма. Мөхтөхтөрүнэ-эттэхтэринэ, эйиэхэ кыыһырдахтарына, сэмэлээтэхтэринэ да барытын көрөн оонньууга-көргө кубулут. Ол эрээри, кими да күлүү-элэк оҥостума. Оччоҕуна үөскээбит боппуруос барыта этэҥҥэ быһаарыллан иһиэ. Нэдиэлэ ортотугар үлэҕэр сыһыан кытааттаҕына, өйдөспөт, тыл тылга киирсибэт буолуу үөскээтэҕинэ, барыларын уоскутарга кыһалын. Ол сатаныа. Үп-харчы боппуруоһа үчүгэй. Эбии харчылаһыаххын эбэтэр бээтинсэҕэ атын үлэҕэ ыҥырыахтарын сөп. Онно чугас дьоҥҥун эбэтэр адьас истиҥник саныыр доҕоргун кытары сүбэлэһэриҥ мэһэйдиэ суоҕа. Бу күннэргэ сибиэһэй салгыҥҥа сылдьыыҥ, дьиэ иһигэр-таһыгар үлэҥ санааҕын көтөҕүө, чэбдигириэҥ.

КЫЫС.  Бу күннэргэ бэйэҥ тускунан хайаан да саныырыҥ, тус бэйэҕэр эрэ болҕомтоҕун уурарыҥ ирдэнэр. Оччоҕуна эрэ үлэҕэр да, олоххор да ситиһиилэниэҥ, табыллыаҥ. Тылгын-өскүн дьон-сэргэ хаһааҥҥытааҕар да истиэ, ылыныа. Ол түмүгэр уруккуттан баҕарбыт баҕаҕын, былааҥҥын олоххо киллэрэр кыахтаныаҥ. Үп-харчы боппуруоһа куһаҕана суох. Онтон бээтинсэҕэ тус олоххор улахан уларыйыы күүтэр. Өрөбүллэргэр урукку доҕотторгун көрсүөҥ. Сибиэһэй салгынынан дуоһуйа тыын, астына сынньан. Өрөбүллэргин туһалаахтык атаар. Ол гынан баран, доруобуйаҕын көрүнэ сылдьаргын, чугас дьоҥҥор болҕомтоҕун уураргын умнума.

ЫЙААҺЫН. Сөбүлүүр үлэҕинэн дьарыктан, оччоҕо сотору ситиһиилэниэҥ. Командировкаттан аккаастаныма. Онно бардаххына тус бэйэҕэр олус наадалаах, туһалаах дьону кытары билсиэҥ. Чэппиэргэ үлэҕэр өйдөспөт буолуу тахсыан сөп. Онно кыттыспатыҥ ордук. Иирсээни тардааччыларга чугаһаама, кинилэр тылларын ылыныма. Харчы иэс көрдөөтөхтөрүнэ биэримэ. Өтөрүнэн төлөөмүөхтэрин сөп. Бу күннэргэ ыраахтан сонун истиэҥ. Өрөбүллэргин дьиэ кэргэҥҥин кытары атаар, сибиэһэй салгыҥҥа сырыт. Доруобуйаҕын көрүн. Сарсыардааҥҥы сэрээккэ туһаны эрэ аҕалыа.

СКОРПИОН. Үлэҕэ-хамнаска төһөнөн көхтөөхтүк кыттаҕын да, соччонон ситиһиилэнэҕин. Ол эрээри, аан маҥнай бу нэдиэлэҕэ тугу үлэлиэхтээххин, оҥоруохтааххын сиһилии былааннаа. Үп-харчы боппуруоһун сэрэдэҕэ быһаарсарыҥ ордук. Оонньууну-көрү хаалларан эрэргэр сулустар сүбэлииллэр. Тоҕо диэтэххэ, чэппиэргэ, бээтинсэҕэ үлэҕинэн саҥа билсиһии күүтэр.  Бу билсиһии кэлин эйиэхэ көмөлөөх буолуо.  Бээтинсэҕэ урут иирсибит дьоҥҥун кытары эйэлэһэргэ кыһалын. Оччоҕуна саҥа дьыалаҕа ылсаргар туох да мэһэй, харгыс көрсүө суоҕа. Бу күннэргэ сэрэйэн көрөр дьоҕургар болҕомтоҕун уур. Түүлгүн өйдүү сатаа.

ОХЧУТ. Толкуйдуур дьоҕуруҥ, булугас өйүҥ хаһааҥҥытааҕар да күүһүрбүт. Бу күннэргэ сонуннары көтүтүмэ. Ордук нэдиэлэ саҥатыгар истибит сонунуҥ улахан наадалаах буолуоҕа. Нэдиэлэ ортото дьыалабыай көрсүһүү күүтэр. Онно көхтөөхтүк кытын. Ол кэлин үлэҕэр көмөлөөх буолуоҕа. Нэдиэлэ бүтүүтэ дьиэҕин-уоккун өрө тарт. Дьиэҥ иһигэр кыраны да уларыттаххына, сууйдаххына-тараатаххына, обуойдаатаххына, дьиэ кэргэҥҥэр ил-эйэ олохсуйуо. Дьонуҥ наһаа үөрүөхтэрэ, көмөлөһүөхтэрэ. Ыал буола иликтэр тапталга табыллыаххыт. Үп-харчы да боппуруоһа үчүгэй. Ол гынан баран, харчыгытынан ыһыахтанымаҥ. Бу күннэргэ кимтэн да иэс ылымаҥ, иэс биэримэҥ.

ЧУБУКУ. Холкутуйуох, сынньалаҥнык сылдьыах  баҕаҥ хаһааҥҥытааҕар да улааппыт. Ол үчүгэй. Эн билигин, бэл, тулаҕар туох буоларын кытары ыксала-бохсоло суох хонтуруоллуугун, сөптөөхтүк быһаараҕын. Үлэлиир тэрилтэҕэр эйигин саамай үчүгэй, истиҥ  сүбэһит быһыытынан сыаналыахтара. Бииргэ үлэлиир дьоҥҥор болҕомтолоохтук сыһыаннас, кинилэр санааларын иһит, истиҥник кэпсэт, сүбэтэ-амата биэр. Кинилэр да хардалара эйиэхэ оннук истиҥ буолуоҕа. Ол гынан баран, бээтинсэҕэ сэрэхтээх буоларыҥ наада. Бу күн тус кистэлэҥҥин кимиэхэ да кэпсээмэ диэн сулустар сүбэлииллэр. Онтон өрөбүллэргин дьиэҕэр атаар. Чугас дьоҥҥор болҕомтоҕун уур, кинилэр доруобуйаларын көр-иһит.

КҮРҮЛГЭН.  Үлэ куобах буолбатах, куотан хаалыа буоллаҕай.  Наһаа нэһирбэтэҕиҥ да иһин, үлэҕинэн аһары үлүһүйүмэ. Ол оннугар уоскуйарга, сынньалаҥнык сылдьарга дьулус, доруобуйаҕын көрүн. Үп-харчы боппуруоһа үчүгэй. Өссө эбии харчылаһар туһунан толкуйдаа. Бу күннэргэ ол табыллыа. Чэппиэр тапталга үчүгэй күн диэн сулустар билгэлииллэр. Бу күн сүгүрүйээччиҥ халлаантан сулуһу да ылан биэрэргэ бэлэм. Өрөбүллэргин туһалаахтык атаар, дуоһуйа сынньан. Үчүгэйдик утуйдаххына, бириэмэҕин сөпкө аттардаххына, сэрээккэлээтэххинэ, чэбдигириэҥ. Чугас дьоҥҥор болҕомтоҕун уур.

БАЛЫКТАР. Бокуойа суох хачыгырайбытыҥ балачча ырааппыт.  Доруобуйаҥ туһунан санаа, көрдөрүн, болҕомтоҕун уур. Үлэ ханна да куотуо суоҕа. Кыратык холкутуйдаххына даҕаны, барытын кэмигэр быһааран иһиэҥ. Бу күннэргэ командировкаҕа баран кэлиэххин, дьыалабыай кэпсэтиигэ кыттыаххын сөп. Онно элбэҕи эрэннэрэр саҥа билсиһии күүтэр. Онно хас хардыыгын сыта-тура толкуйдаан көрөргөр сулустар этэллэр. Өрөбүллэр диэки балаһыанньа биллэ тупсуо. Бээтинсэҕэ — харчы, субуотаҕа – соһуччу бэлэх тутуоҥ. Сүгүрүйээччигэр болҕомтоҕун уур. Аахайбатаххына куоттаран кэбиһиэххин сөп. Кинини туораттан сэҥээрээччилэр бааллар. Өрөбүлгэ дьиэ кэргэҥҥин эбэтэр чугас доҕотторгун кытары сибиэһэй салгыҥҥа сырыт. Үчүгэй сонуҥҥун чугас дьоҥҥор эрэ арый.

0
0
21 января 21.01
  • -48°
  • $ 73,82
  • 83,32