Национальнай бибилэтиэкэҕэ олунньуга буолан ааспыт «Сахалыы дьыктаан» аахсыйа түмүгэ биллэн, бастыҥнар наҕараадаланнылар, ол туһунан тэрилтэ телеграм-ханаала суруйда.
Бибилэтиэкэ уораҕайыгар 140 тахса киһи дьыктааны суруйан, ийэ тылын төһө билэрин, сөпкө суруйарын тургуппута. Дьыктааҥҥа саха норуодунай суруйааччыта Василий Яковлев — Далан «Кэриэн ымыйа» хомуурунньугуттан быһа тардан ааҕан иһитиннэрбиппит.
Бастыҥтан бастыҥ суруксут ааты Дьокуускайдааҕы култуура уонна ускуустуба кэллиэһин устудьуона Степан Быкалыров, бибилэтиэкэрдэр Диана Бырдака, Арчыына Константинова, тыл үөрэхтээҕэ Прасковья Кузьмина, Дьокуускайдааҕы култуура уонна ускуустуба кэллиэһин социальнай педагога Михаил Рожин ыллылар, оттон «Бастыҥ» үлэлээх Петр Мучин буолла.
Светлана Алексеева, Александра Ермолаева, Василий Иванов, Күннэй Иванова, Варвара Исакова, Варвара Оконешникова, Лилия Соловьева, Лена Степанова, Елена Стручкова уонна Марианна Филиппова дьыктааны «үчүгэй» сыанаҕа суруйбуттар.
Маны таһынан, «Ситим» медиа хампаанньаттан «Кыым» хаһыат сүрүн эрэдээктэрэ Владимир Степанов Степан Быкалыровка уонна Арчыына Константиноваҕа анал бириистэри туттарда.
СӨ Национальнай бибилэтиэкэтэ уонна Хотугулуу-Илиҥҥи федеральнай үнүбэрситиэт РФ Хотугулуу-Илиҥҥи норуоттарын тылларын уонна култуураларын үнүстүүтүн саха тылын хаапыдырата Сахалыы дьыктааны быйыл 12 төгүлүн тэрийэн ыыттылар. Дьыктаан бүтүн өрөспүүбүлүкэ үрдүнэн ыытыллар үтүө үгэстэммитэ. Быйыл аахсыйа 371 бибилэлэтиэкэҕэ буолан ааста, барыта 4400 тахса киһи суруйда. Чурапчы, Уус Алдан, Сунтаар, Мэҥэ Хаҥалас, Нам, Дьааҥы бибилэтиэкэлэрэ ордук көхтөөхтүк кытыннылар.
This post was published on 12.03.2026 12:01 12:01