Ставропольга “Российская студенческая весна» тэрээһиҥҥэ 40 устудьуон уонна Саха сирин түөрт профессиональнай үөрэх тэрилтэтин салайааччылара кыттыахтара. Ыччат тэрээһинэ балаҕан ыйын 15-21 күннэригэр ыытыллыаҕа уонна РФ 70-тан тахса регионуттан 2000-тэн тахса кыттааччыны түмүөҕэ, диэн өрөспүүбүлүкэ профессиональнай үөрэҕи сайыннарыы институтуттан иһитиннэрдилэр.
Саха сирин аатынан С.Ф. Гоголев аатынан саха педагогическай колледжа, И.Е. Винокуров аатынан Нам педагогическай колледжа, В.М. Членов аатынан индустриальнай-педагогическай колледж, В.А. Вонгродскай аатынан медицина колледжа, «Айтыын» цифровой технология колледжа уонна Жатай техникума кытталлар.
Бэстибээл сүрүн тиэмэтэ — Аҕа Дойду Улуу сэриитигэр Кыайыы 80 сыла уонна Россияҕа Аҕа дойдуну көмүскээччи сыла. Өйдөбүнньүк даатаны чиэстээн саҥа номинациялар эбилиннилэр – ырыа хайысхатыгар “Фронт ырыата» уонна тыйаатыр хайысхатыгар “Фронтовая проза уонна поэзия”.
Барыта 10 айар хайысха чэрчитинэн 1000-тан тахса куонкурус үлэтэ киирдэ, олору 70-тан тахса авторитетнай эксперт — Россия искусствотын, культуратын уонна үөрэҕин деятеллэрэ сыаналыахтара.
Биллэриллибит уон хайысхаттан саха устудьуоннара сэттэтигэр кыттыахтара, ол иһигэр “Региональнай программаҕа”, ол чэрчитинэн “Көлүөнэлэр өйдөбүллэрэ: сүрэххэ Кыайыы баар» диэн туруорууну билиһиннэриэхтэрэ.
Санатан эттэххэ, Былырыын фестивальга Саха сирин 13 профессиональнай үөрэх тэрилтэтиттэн 47 устудьуон кыттыбыта. Бэстибээл финалыттан регион хамаандата араас хайысхаларга аҕыс наҕарааданы аҕалбыта.
This post was published on 09.09.2025 12:29 12:29