Саха тустууга оскуолатын биэс иитиллээччитэ аан дойду чемпионатыгар киирдэ. Быйылгы саамай улахан аан дойдутааҕы старт Хорватияҕа балаҕан ыйын 13-16 күннэригэр буолуоҕа, диэн ЯСИА иһитиннэрэр.
Көҥүл тустууга аан дойду чемпионата кыттааччылар саамай күүстээх састааптарын хомуйарга эрэннэрэр. Бэйэлэрин маастарыстыбаларын Олимпийскай оонньуулар, ааспыт аан дойду чемпионаттарын кыайыылаахтара уонна призердара көрдөрөргө бэлэмнэр.
57 киилэҕэ саха тустууга оскуолатын үс бэрэстэбиитэлэ кыттар. Европа чемпиона Владимир Егоров Македонияттан, аан дойду боруонса призера Арыйаан Тютрин Белоруссияттан, Албанияҕа рейтинг турнирын финалиһа Айаал Белолюбскай Таджикистантан көбүөргэ тахсаллара күүтүллэр. Кинилэр балаҕан ыйын 14 күнүгэр тустууну саҕалыахтара, оттон уоскутар уонна финал хапсыһыылар сарсыныгар былааннаналлар. Бу ыйааһыҥҥа барыта 33 бөҕөс киирдэ.
Маны сэргэ Олимпийскай оонньууларга кыттыбыт икки спортсмен — Таджикистантан Виктор Рассадин (70 кг) уонна Австралияттан Георгий Окороков (61 кг) тусталлара күүтүллэр. Кинилэр тустууну бастакынан балаҕан ыйын 13 күнүгэр, уоскутар уонна финалга көрсүһүүлэр балаҕан ыйын 14 күнүгэр саҕалыахтара.
This post was published on 05.09.2025 18:14 18:14