ХИФУ технологическай институтун преподавателэ Николай Пахомов ынах иигэ тутуу маһын хаачыстыбатын биллэ тупсарарын туһунан этэр. Ити туһунан кини СИА-ҕа кэпсээтэ.
«Бу ньыманы оҥоруох иннинэ мин устудьуоннарым «Шаг в будущее», «Интеллектуальный десант» курдук улахан конференцияларга бу бырайыагынан ситиһиилээхтик кыттыбыттара.
Аныгы технология төһөнөн сайдар да, соччонон айылҕа дьиктитэ аһыллан иһэр. Ону биһиги сороҕор саҥаттан билэбит” — , диир кини.
Учуонай этэринэн, ынах иигинэн сотуллубут мас умайбат, ону таһынан биллэ кытаатар, хайыта барбат буолар.
«Былыргы биһиги өбүгэлэрбит ону бэрт үчүгэйдик билэллэрэ уонна олоххо туһаналлара. От үлэтин тэрилин барытын харыытаҕа кутуллубут ынах иигэр сытыараллара.
ССРС кэнниттэн баараҕай хотоннор хаалбыттара. Олору уматыы саҕаламмыта. Хотоннор эркиннэрэ, кырыыһалара бэрт үчүгэйдик умайаллара, оттон муосталара уокка бас бэриммэттэр этэ.
Ынах иигин састаабын ымпыктаан үөрэтиэххэ наада. Холобур, биһиги эксперимеҥҥэ икки биир тэҥ бэрэбинэни ылбыппыт. Биир бэрэбинэни сыыйа-баайа ынах иигинэн сотон киирэн барбыппыт. Сотору буолан баран бу маспыт хаппатын, хайыта барбатын бэлиэтии көрбүппүт.
Оттон бэрэбинэлэри уокка бырахпыппыт. Бастакыбыт тута умайбыта, оттон иигинэн сотуллубут мас бэрт дуона суохтук умайыта», — диир учуонай.
Николай Пахомов тыа сиригэр бу ньыманы тутуу олус наадалааҕын чиҥэтэн этэр. Бу түмүгэр мас тааска тэҥнээх матырыйаалга кубулуйарын кини ойуччу тутан этэр. Намҥа, Чурапчыга сорох өттө иигинэн сотуллубут дьиэлэр баалларын, бу дьиэлэргэ тэллэй да, түүнүк да тахсыбатын кини кэпсиир.
Дьон иик сытыттан сиргэнэр. Ол эрээри, маска сыт иҥмэтин учуонай итэҕэтэр.
This post was published on 27.06.2016 10:51 10:51