19 Тохсунньу 19.01
  • -48°
  • $ 73,82
  • 83,32

Саха тустууктара Дмитрий Коркин аан дойдутааҕы турнирыгар биэс мэтээли ыллылар

11:10, 03 октября 2016
Текст:

Дмитрий Коркин сырдык кэриэһигэр анаммыт аан дойдутааҕы IX турнирга Саха сирин биэс тустууга кыһыл, үрүҥ уонна үс боруонса мэтээли кэттилэр.


Бастакы күҥҥэ кыһыл көмүс соҕотох мэтээли 57 кг диэри ыйааһыҥҥа тустар Ньургун Александров ылла. Финалга устудьуоннар ортолоругар ыытыллыбыт аан дойду чөмпүйэнээтин кыайыылааҕын Дондука-оол Хуреш-оолу (Тыва) 3:2 ахсаанынан кыайда.

«Кыһыл көмүс мэтээл иһин киирсии иннинээҕи күөн көрсүүлэр чэпчэки этилэр. Дондуком-оолу кытта үс сыллааҕыта бу турнирга тустубуппут. Кыайыы ыараханнык кэлбитэ. Кини – күүстээх утарсааччы. Бүгүн кинини кыайбыппыттан олус үөрдүм. Турнирга төрдүс төгүлбүн кыттабын, ол эрээри биирдэ да кыайа илик этим. Кыайыыбын тренердарбар Гаврил Игнатьевка уонна Артур Федоровка аныыбын», — диир Ньургун Александров.

Эмиэ бу ыйааһыҥҥа боруонса мэтээллэри Арыйаан Тютрин уонна Александр Рассадин ыллылар.

«Финалга боруонса мэтээл иһин киирсиигэ урут тустар утарсааччыларбын кытта күөн көрүстүм. Урут да, билигин да кыайдым. Кыайыы улахан сыранан кэллэ. Доҕорум Ньургун туһугар үөрүүм муҥура суох улахан», — диэтэ Арыйаан Тютрин.

65 кг диэри ыйааһыҥҥа Виктор Рассадиҥҥа улаханнык эрэммиттэрэ. Кини нэдиэлэ аннараа өттүгэр «Шахтерская слава» турнирга иккис миэстэни ылбыта. Ол эрээри тустуук саннын эчэтэн салгыы кыайан тустубата. Кыһыл көмүс мэтээли японец Даичи Такатани ылла.

Ыарахан ыйааһыҥҥа Евгений Алексеев Кытай тустуугун Чаганджана Чаганджананы кытта кииристэ уонна 3:2 ахсаанынан хотто. Саха тустууга Никита Семенов Белоруссия спортсменыгар Владимир Езапенковка кыайтарда.

57 кг диэри ыйааһыҥҥа:

1 миэстэ — Ньургун Александров (Саха сирэ);

2 миэстэ — Дондук-оол Хуреш-оол (Тыва);

3 миэстэ — Арыйаан Тютрин (Саха сирэ);

3 миэстэ — Александр Рассадин (Саха сирэ);

65 кг диэри:

1 миэстэ — Даичи Такатани (Япония);

2 миэстэ — Виктор Рассадин (Саха сирэ);

3 миэстэ — Ратмир Керефов (Москва-КБР);

3 миэстэ — Мурад Нукхаджиев (Красноярскай);

74 кг диэри:

1 миэстэ — Ацамаз Санакоев (Алания);

2 миэстэ — Никита Сучков (Красноярскай);

3 миэстэ — Эртине Мортуй-оол (Тыва);

3 миэстэ — Тажутин Акаев (Москва);

96 кг диэри:

1 миэстэ — Юрий Белоновский (Красноярскай);

2 миэстэ — Мурази Мчелидзе (Украина);

3 миэстэ — Евгений Алексеев (Саха сирэ);

3 миэстэ — Владимир Езапенков (Беларусь).

0
0
19 января 19.01
  • -48°
  • $ 73,82
  • 83,32