Кулун тутар 15 күнүгэр Олимпийскай оонньуулар үрүҥ көмүс призердара Александр Иванов 75 сааһыгар Дьокуускайга Саха сирин, Бурятия, Монголия уонна Азия дойдуларын сүүмэрдэммит хамаандаларын тустууктарын көрсүһүүлэрэ буолла. Күрэхтэһии 18 сааһыттан 21 сааһыгар диэри кэскиллээх тустууктары хомуйда. Хапсыһыыларга ордук элбэх бааллары ылбыт кыайыылаахтарынан Саха сирин спортсменнара буоллулар.
«Триумф» спортивнай комплекс көбүөрүгэр 57-тэн 97 киилэҕэ диэри тоҕустуу тустууктаах сүүмэрдэммит хамаандалар көрүстүлэр. Ююниордар ортолоругар матчевой көрсүһүүлэр киэбинэн күрэхтэһии өрөспүүбүлүкэҕэ аан бастаан ыытылынна. Финалга Саха сирин сүүмэрдэммит хамаандата Бурятия спортсменнарын 6:3 ахсаанынан кыайда.
«Хас биирдии матч түмүктэннэҕинэ, таһымыттан, ыытыллар миэстэтиттэн тутулуга суох, спортсменнар бэлэмнэрин, этиилэрин ырытан, түмүк оҥоруохтаахтар: бу кэм устата туох туһалааҕы ыллылар? Бу кэлэр күрэхтэһиилэргэ көмөлөһүөҕэ», — диэн ССРС спордун үтүөлээх маастара Александр Иванов сүбэлээтэ.
«Александр Николаевич бэйэтин аатын уонна саха спордун Олимпийскай оонньуулар историяларыгар суруйбута. Бу саха дьонугар бэйэтин үлэтинэн, санаатынан, күүһүнэн эрэли үөскэппит талааннаах спортсмен: аан дойду түһүлгэтигэр үрдүк спортивнай ситиһиилэри ситиһэр кыахтаапыт диэн. Онон уонунан сыллааҕыта уонна билигин даҕаны саха норуота Александр Ивановы дириҥник ытыктыыр, ырыа уонна хоһоон аныыр», — диэн Саха сирин бырабыыталыстыбатын бэрэсэдээтэлин солбуйааччы Сергей Местников тыл эттэ.
