Сэтинньи 12-22 күннэригэр Былатыан Ойуунускай аатынан Саха театра 120-с айар дьылын чэрчитинэн Волга өрүс кытылыгар турар куораттарынан/ Поволжье куораттарынан гостуруолга турунна.
“Большие гастроли” федеральнайдааҕы бырагыраама чэрчитинэн ыытыллар гастроллар Йошкар-Олаҕа (Марий Эл Өрөспүүбүлүкэтэ), Чебоксарга (Чувашия Өрөспүүбүлүкэтэ) уонна Буинскайга (Татарстан Өрөспүүбүлүкэтэ ) үс куораты хабыахтара.
Бу Россия култууратын бөҕөргөтөр, норуоттар ураты майгыларын көрдөрөр сыаллаах бырайыак Поволжье көрөөччүлэрин Саха театральнай искусствотын кытта билиһиннэриэ.
Гостуруол бырагырааматыгар Саха театрын репертуарыттан үс ураты буочардаах/көрүүлээх режиссер туруоруутугар аан дойду классиката, нуучча литературатын биллиилээх айымньыта уонна саха норуотун историятын, култууратын көрдөрөр испэктээкиллэр киирдилэр.
Россия народнай артыыһа, Саха театрын уус-уран салайааччыта, биллиилээх режиссер Андрей Борисов туруоруутугар Улуу Шекспир өлбөт-сүппэт айымньыта, Россия судаарыстыбаннай бириэмийэтинэн наҕараадаламмыт уонна “Кыһыл көмүс мааска” Россия театрдарын национальнай бириэмийэтинэн наҕараадаламмыт “Илиир Хоруол” испэктээкил гостуруолу арыйыаҕа.
СӨ искусстволарын үтүөлээх диэйэтэлэ, киэҥник биллэр режиссер Сергей Потапов туруоруутугар Михаил Булгаков “Маастар уонна Маргарита” испэктээкилэ көстүөҕэ. Саха режиссерун көрүүтүнэн нуучча классикатын сахалыы ааҕыы уратытын көрдөрүө.
СӨ искусстволарын үтүөлээх диэйэтэлэ, Саха театрын сүрүн режиссера Руслан Тараховскай туруоруутугар Саха народнай суруйааччытын Василий Яковлев-Далан романынан “Тулаайах оҕо” испэктээкилэ кыргыс үйэтин кэмигэр ил-эйэ, сомоҕолоһуу эрэ норуокка тыыннаах хаалар эркээйилээх суолун тэлбитин көрдөрүө.
«Саха театрын хаарыан хампа кытыллара: Өлүөнэттэн Волгаҕа диэри» гастроллар Россия култууратын олоҕор ураты көстүү буолуоҕа, регионнар икки ардынааҕы айымньылаах сибээһи бөҕөргөтүө, саҥа бырайыахтарга саҥа саҕахтары арыйыа, доҕордоһуу уонна бырааттыы култууралар кэпсэтиилэрин чаҕылхай холобура буолуо диэн эрэнэбит.
Ааптар: Лилия Уваровская
This post was published on 13.11.2025 15:07 15:07