Бу нэдиэлэҕэ Саха сириттэн анал байыаннай дьайыы ыытыллар зонатыгар өссө алта гуманитарнай көмөлөөх уонна аадырыстаах баһыылкалардаах массыына ыытыллыаҕа. Бу туһунан бүгүн нэдиэлэ аайы ыытыллар брифиҥҥэ өрөспүүбүлүкэ гражданскай оборуонаҕа дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистирин солбуйааччы Яна Наумова иһитиннэрдэ.
«Маны таһынан Донбасска көмө уонна өйөбүл Хотугулуу-Илиҥҥи пуондатыттан Аҕа дойдуну көмүскээччилэр күннэригэр ас- үөл бырааһынньыктааҕы баһыылкаларын байыаннайдарга анаан мунньаллар», — диэн кэпсээтэ кини.
Яна Наумова этэринэн, 2026 сыл саҕаланыаҕыттан өрөспүүбүлүкэттэн АБДь зонатыгар гуманитарнай таһаҕаһы тиэйэргэ үс рейс тэриллибит.
«Анал дьайыы байыастарыгар аҕыс техника, 12 туонна гуманитарнай көмө уонна аадырыстаах баһыылка тиэрдилиннэ», — диэн миниистир солбуйааччыта бэлиэтээтэ.
This post was published on 29.01.2026 13:01 13:01