Саха сирин хаартыскаҕа түһэрээччитэ Алексей Васильев KAAF 2025 аан дойдутааҕы куонкуруска бастакы миэстэни ылла.
Алексей Васильевка «Социальнай документалистика» категорияҕа бастакы миэстэни «Томпо» бырайыагын иһин анаатылар. Кини үлэлэрэ Ирантан, Кытайтан, Испанияттан, Кубаттан, Болгарияттан, Бангладештан киирбит үлэлэри баһыйдылар.
Санатан эттэххэ, 2021 сыллаахха Васильев Аан дойдутааҕы World Press Photo профессиональнай куонкуруска кыайбыта. Кини «Проблемы современности» категорияҕа «Сахавуд» сериятынан бэлиэтэммитэ. Онно олохтоох култуураны уонна үгэстэри харыстыыр ньымалартан биирдэстэрэ буолбут саха тылынан киинэлэри оҥоруу туһунан кэпсэнэр.
Ону тэҥэ кини аан дойду үрдүнэн элбэх атын престижнай куонкурустарга, быыстапкаларга кыттыбыт. Кини үлэлэрэ Time, The Big Issue сурунаалларга, The best of LensCulture кинигэ бастакы томугар уонна да атыттарга бэчээттэммиттэрэ.
