Саха сириттэн бу күннэргэ Россия президенэ Владимир Путин сорудаҕынан тэриллибит «Патриотическая» ТОР федеральнай бырагырааманы олоххо киллэрии чэрчитинэн анал байыаннай дьайыы бойобуой соруктарын толорор байыаннай чаастарга «Якт-Сокол» квадроцикллар уонна «Хотой» пилотнай көтөр аппараттар бэрилиннилэр. Бу туһунан нэдиэлэ аайы ыытыллар брифиҥҥэ өрөспүүбүлүкэ гражданскай оборуонаҕа дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистирин солбуйааччы Яна Наумова иһитиннэрдэ.
Кини Саха сирин оперативнай штаба уонна АБДь зонатыгар өрөспүүбүлүкэ тирэх пууннара анал байыаннай дьайыы кыттыылаахтарын бары наадалаах тэрилинэн, техниканан хааччыйыыга тиһиктээх үлэни салгыылларын бэлиэтээтэ.
«Өрөспүүбүлүкэ бары муниципальнай оройуоннарыгар Саха сириттэн кэлбит байыаннайдарга биэрэргэ гуманитарнай баһыылкалар, тырааныспар уонна техника, бородуукта набордарын хомуйуу салҕанар», – диэн Яна Наумова кэпсээтэ.
Анал байыаннай дьайыыны өйүүр үлэни өрөспүүбүлүкэтээҕи “Кыайыыга Бииргэ!” хамыыһыйа сүрүннүүр, регион баһылыга Айсен Николаев салайар. Фроҥҥа көмөҕө аҥардас 2025 сылга сүүһүнэн транспорт, тыһыынчанан квадрокоптер, генератор, сибээс сириэстибэтэ уо.д. а. тиксэрилиннэ.
This post was published on 19.02.2026 13:03 13:03