Анал байыаннай дьайыы бэтэрээнэ Николай Петров бааһыран баран, атаҕын ампутациялатта. Кини Сергиев Посад куоракка Мещеряков аатынан реабилитация киинигэр доруобуйатын чөлүгэр түһэрии кууруһун ааста. Бу 2024 сыллаахха арыллыбыт ураты комплекс сүүһүнэн байыаска көмөлөстө. Манна АБДь бэтэрээннэрэ реабилитация, эмтэнии эрэ буолбакка, социальнай адаптацияны ааһаллар, саҥа идэлэри баһылыыллар уонна спордунан дьарыктаналлар. Ол туһунан www.sakha.gov.ru сайт суруйар.
Социальнай сүрүннээччи Евгения Каменяр өйөбүлүнэн Николай Петров бары өттүнэн көмөнү ылла. Саха сиригэр «Аҕа дойдуну көмүскээччилэр» судаарыстыбаннай пуонда филиала былырыын эмиэ кинини Новосибирскай уобалас Бердск куоратыгар реабилитацияҕа ыыппыта.
«Николай Будимирович биһиэхэ сыһыарылан, кинини арыаллыыбыт. Киниэхэ олорор дьиэни адаптациялааһын ыытыллыбыта, итинтэн олус астыммыта. Киниэхэ адаптивнай таҥас бэрилиннэ. Биһиги кини реабилитацияланар дьаһалын салгыы арыаллыыбыт, медицинскэй боппуруостарга эрэ буолбакка, социальнай адаптацияҕа көмөлөһөбүт. Биир атаҕар эндопротезирование оҥоһуллара былааннанар. Сайын Анапаҕа санаторнай-курортнай эмтэниигэ ыыппыппыт. Билигин кини Москва таһыгар Бэс Чагда санаторийыгар реабилитация ааһар», — диэн социальнай сүрүннээччи Евгения Каменяр кэпсээтэ.
Николай Петров БАРС-2 баҕа өттүнэн этэрээт кэккэтигэр бойобуой соруктары толорбута. Госпиталларга уһуннук эмтэнэн, дьиэтигэр төннөн баран, бэтэрээн «Защитники Отечества» судаарыстыбаннай пуонда Саха сиринээҕи филиалыгар көмө көрдөөбүтэ.
Саха сирин баһылыга Айсен Николаев былырыын ахсынньыга Ил Түмэҥҥэ туһаайыытыгар демобилизацияламмыт буойуннарга приоритетнай бэрээдэгинэн медицинскэй көмө оҥоһулларын бэлиэтээбитэ: чинчийии, эмтээһин, кэлим медицинскэй реабилитация.
«Уустук анал көмөҕө «якорнай» клиникалар быһаарылыннылар. Бойобуой дьайыы бэтэрээннэрин, ордук дьиэ кэргэннэрин чилиэннэрин, өлбүт уонна сураҕа суох сүппүт байыастар оҕолорун уйулҕаларын араҥаччылааһыны күүһүрдэр наадата баар. Социальнай реабилитация уонна буойуттары эйэлээх олоххо адаптациялааһын боппуруостара ураты болҕомтону эрэйэллэр. Бу үөрэтии уонна үлэҕэ киирии, уопсастыбаннай олоххо тардыы», – диэтэ Ил Дархан.
