2025 сыл саҕаланыаҕыттан гуманитарнай таһаҕаһы тиэйэр тырааныспар хампаанньалара Саха Сирэ — Донецкай Народнай Өрөспүүбүлүкэ хайысханан 20 рейс оҥордулар. СВО зонатыгар 58 тырааныспар уонна хас да туонна гуманитарнай көмө тириэрдилиннэ. Ол туһунан нэдиэлэтээҕи брифиҥҥэ гражданскай оборуона миниистирэ Дмитрий Лепчиков иһитиннэрдэ.
«Бу нэдиэлэҕэ эбии биэс тырааныспар барарга бэлэм турар, байыаннай чаастарга Саха сирин тэрилтэлэрэ ыыппыттара», – диэтэ миниистир.
Кини эппитинэн, Саха сирин тирэх пууннарыгар пилота суох көтөр аппарааттары байыаннайдарга тиксэрэллэригэр бэрилиннэ. Маны сэргэ тепловизионнай прицеллар, обмундирование, радиоэлектроннай охсуу прибордара, тус харыстанар сириэстибэлэр, «Якт-Сокол» квадроциклларга сапчаастар бааллар.
«Бэҕэһээ Илиҥҥи байыаннай уокурук бэрэстэбиитэллэрин кытта көрсүһүү буолбута. Онно анал байыаннай дьайыыга кыттар байыаннай сулууспалаахтары эбии наадалаах тэриллэринэн хааччыйар туһунан кэпсэтии буолла», – диэтэ Дмитрий Лепчиков.
This post was published on 20.03.2025 10:02 10:02