Киһи уорганын, ол иһигэр бүөрү, быары атын киһиэхэ көһөрүү Арассыыйа аҕыйах регионнарыгар курдук Саха сиригэр эмиэ оҥоһуллар. Транплантология курдук үрдүк технологиялаах медисиинэ салгыы сайдарыгар уопсастыба эргиччи өйөбүлэ уонна уорган донорствотыгар сыһыан тосту уларыйыахтааҕын туһунан алтынньы 20 күнүгэр өрөспүүбүлүкэ ыстааты таһынан трансплантолога Альберт Васильев «Инникигэ эрэл» фестивал кэмигэр эттэ.
«Уорганы көһөрүүгэ наадыйыы биһиги өрөспүүбүлүкэбитигэр муҥутуур улахан. Олоҕу быыһааһын уонна олох хаачыстыбатын тупсарыы инники күөҥҥэ тутуллар. Уорганы көһөрүү эпирээссийэтэ уустук уонна сыаната ыарахан. Саамай сүрүн кыһалҕа – донор суоҕа», — диэтэ Альберт Васильев.
Дьону өлөрөн туран уорганы ылыы туһунан сурах-садьык дэлэйиитэ донорство сайдарыгар улаханнык мэһэйдиир.
«Инникигэ эрэл» фестивал ыҥырыылаах ыалдьыта академик В.И.Шумаков аатынан транплантология уонна искусственнай уорган федеральнай научнай киинин отделениетын сэбиэдиссэйэ Сергей Мещерин ити этиини кытта сөпсөһөр.
Сергей Мещерин этэринэн, төбөлөрүн мэйиитин үлэтэ тохтообут, аппарааттар көмөлөрүнэн уорганнара өссө да үлэлии турар дьон донор буолар кыахтаахтар.
«Төбө мэйиитин үлэтэ тохтоото да, киһи реанимацияҕа аҕалыллар. Оччотугар олоҕу харыстыыр тэрээһиннэр күүскэ ыытылаллар. Быһа холуйан 8 чаас устата иҥэн-тоҥон чинчийии, сүбэлэһии кэнниттэн мэйии өлүүтүн туһунан диагноз тахсар. Бу киһи аймахтара утарбат буоллахтарына, уорганы ылаллар», —диэн Мещерин кэпсиир.
Уорганы көһөрүү медисиинэ сайдыытыгар тутаах оруоллаах. Өлүү кэнниттэн уорганы атын киһиэхэ биэрии олоҕу салҕааһыҥҥа тэҥнээҕин фестивал кэмигэр элбэхтэ эттилэр.
