Саха сирин тоҕус олохтооҕо өрөспүүбүлүкэ бочуоттаах настаабынньыга буоллулар. Наҕараадалааһын сиэрэ-туома кулун тутар 2 күнүгэр буолла уонна быйыл аан бастаан Арассыыйа бэрэсидьиэнэ Владимир Путин ыйааҕынан официальнайдык бэлиэтэнэр настаабынньык күнүгэр ананна.
Регион баһылыга Айсен Николаев бэлиэтээбитинэн, Саха сиригэр настаабынньык буолуу ураты суолталаах. «Саха ирин Бочуоттаах настаабынньыга» бэлиэ 2024 сыллаахха эдэр исписэлиистэргэ билиини биэрэр уопуттаах үлэһиттэр өҥөлөрүн билинэргэ олохтоммутун санатта.
«Бүгүн бу үрдүк наҕараадаҕа араас эйгэттэн — доруобуйа харыстабылын, суол хаһаайыстыбатын, дьиэ-уот хомунаалынай комплекс, үөрэх, култуура, энергетика настаабынньыктара буоллулар. Хас биирдии аат кэннигэр үтүө суобастаах үлэ, бэйэтин дьыалатыгар бэриниилээх буолуу уонна идэлээх дьон саҥа көлүөнэлэрин үөскэтиигэ улахан кылаат турар. Наҕараадаламмыттары барыларын истиҥник эҕэрдэлиибин», — диэн Саха сирин баһылыга Айсен Николаев МАХ ханаалыгар суруйда.
Үөрүүлээх тэрээһиҥҥэ биэс киһи бэйэлэрин наҕараадаларын кэлэн ылла. Олор ортолоругар Саха Өрөспүүбүлүкэтээҕи онкологическай диспансерын медицина эдьиийэ Надежда Винокурова, «Бүлүү» айан суолун управлениетын сүрүннүүр экспертэ Альфия Кученова, ОДЬКХ ГУТ Үөһээ Бүлүүтээҕи филиалын ис умайыы двигателлэрин масыныыһа Василий Николашкин, Уус Алдан улууһун «Кэнчээри» эстетическэй киинин эбии үөрэхтээһинин дириэктэрэ уонна педагога Василий Парников, «Водоканал» оперативнай-көһө сылдьар биригээдэ электромонтера Николай Плешаков бааллар.
Үтүөлээх үлэһиттэри Саха сирин бырабыыталыстыбатын бэрэссэдээтэлин бастакы солбуйааччы Дмитрий Садовников наҕараадалаата.
Медсиэстэрэ Надежда Винокурова практическай доруобуйа харыстабылыгар настаабынньык буолуутун суолтатын тоһоҕолоон бэлиэтээтэ, онкологическай ыарыһахтарга медицинскэй көмө хаачыстыбатын үрдэтэргэ эдэр кэллиэгэлэрин күн аайы өйөөһүнүнэн уонна үөрэтиинэн дьарыктанарын бэлиэтээтэ.
«Хас биирдиибит бэйэбит үлэлиир миэстэбитигэр, оҥорон таһаарыыга, оскуолаҕа дуу, балыыһа палаататыгар дуу, суолун саҥа саҕалыыр дьоҥҥо профессионализм төрдүн уурарга кыһаллар. Уһуйааччы буолууттан үөрэтэр эрэ буолбакка, олох муудараһын үллэстии, ыарахан түгэннэргэ өйөөһүн уонна үөрэнээччитин ситиһиитигэр сороҕор бэйэтиттэн ордук итэҕэйии буолар. Настаабынньык үлэтин бүгүн маннык үрдүк судаарыстыбаннай таһымҥа сыаналыырын иһин өрөспүүбүлүкэ салалтатыгар махтал. Бу наҕараада биһиги идэбитигэр уопсай бэриниилээхпит бэлиэтэ буоллун. Барыгытыгар доруобуйаны уонна уопсай дьыалабытыгар чэчирии сайдыыны ситиһии», — диэтэ Надежда Винокурова.
Санатан эттэххэ, Саха сирин бочуоттаах настаабынньыгын ааттара аан бастаан 2025 сыллаахха өрөспүүбүлүкэ күнүн иннинэ иҥэриллибитэ.
This post was published on 03.03.2026 10:14 10:14