Дьокуускайга олунньу 22 күнүгэр Серафим Попов сырдык кэриэһигэр «Дархан Уус» өрөспүүбүлүкэ тимир уустарын XV сүрүн быыстапкалара ыытыллыаҕа. 10-тан тахса улуустан 70-тан тахса бастыҥ маастар быйылгы чочуйан оҥорбут үлэлэринэн кыттыахтара.
Кыайыылаахтары үс номинациянан быһаарыахтара: “Барытыгар туттуллар быһах”, “Уус-ураннык чочуллубут бастыҥ быһах” уонна “Куухунаҕа туттуллар бастыҥ быһаҕа”.
Тимир уустарын уус-уран ньымаларын Россия художественнай Академиятын чилиэн-кэрэспэдьиэнэ Дьулустан Бойтунов сыаналыаҕа. Куукуна быһаҕын боруобалааһыны асчыт Константин Матаннанов салайааччылаах Иннокентий Тарбахов үөрэнээччилэрин хамаандата ыытыаҕа.
Куонкурус дьүүллүүр сүбэтин Саха сирин баһылыгын «Үлэ Киһитэ» бириэмийэтин лауреата, норуоттар икки ардыларынааҕы быыстапкалар хас да төгүллээх кыайыылааҕа Сарыал Билюкин салайыаҕа.
