Саха сиригэр паром навигацията саҕаланна. Сорох улуустарга паромнар болдьохтон алта күн эрдэлээн, ууга таҕыстылар. Ол туһунан ыам ыйын 18 күнүгэр буолбут брифиҥҥэ тырааныспар миниистирин солбуйааччы Семен Коркин эттэ.
«Паром судоходствота Өлүөнэҕэ үөһэттэн Ленскэйгэ диэри аһаҕас. Манна сезон биэс — алта күн эрдэлээтэ. Балаһыанньа мониторина Хаҥалас улууһугар уонна Дьокуускайга ыытыллар. Барыллаан суол арыллыыта — ыам ыйын 23 — 25 күннэрэ», — диэтэ Коркин.
Дьокуускай — Аллараа Бэстээх хайысханан сезон кэмигэр 14 паром сүүрүөҕэ.
Бүлүү бөлөххө, быһа барыллаан, ыам ыйын 26 күнүттэн паромнар сырыылара саҕаланыаҕа.
«Алдан өрүскэ Дьабарыкы Хайа таһынан арылынна. Ити эрээри манна уу аҕыйах буолан, муус кытылга баар, онон паром тохтууругар мэһэйдэр үөскүүллэр. Техника үлэлиир», — диэтэ Семен Коркин.
This post was published on 19.05.2025 16:03 16:03