Чугастааҕы икки сууккаҕа Красноярскай кыраайтан кэлбит итии циклон оннугар антициклон кэлиэҕэ. Ол түмүгэр Саха сирин киин уонна арҕаа оройуоннарыгар температура намтыыра күүтүллэр диэн, СИА-ҕа Саха гидромет киинин начальнига Татьяна Маршалик иһитиннэрдэ.
Синоптиктар кулун тутар 2 уонна 3 күннэригэр түүнүн — 35-40 кыраадыска, илин эҥэр улуустарга — 40-43 диэри тымныйарын күүтэллэр. Күнүс -22-27 кыраадыс туруоҕа, сарсыарда тымныы туман түһүөн сөп.
Өрөспүүбүлүкэ хотугулуу-илиҥҥи өттүгэр тымныы туруоҕа. Кэккэ оройуоннарга түүнүн — 42-47 кыраадыска, Өймөкөөҥҥө -52- гэ диэри тымныйыаҕа.
Бу нэдиэлэ бүтүүтэ Саха сирин сиригэр-уотугар сылыйыы циклона күүтүллэр. Өрөспүүбүлүкэ соҕуруулуу-арҕаа өттүгэр ириэрии буолуон сөп.
«Өрөспүүбүлүкэ арҕаа өттүгэр, онтон өрөбүл күн киин уонна соҕуруу оройуоннарга итии циклон кэлиэҕэ. Билигин биллэринэн, араас тэтимнээх хаар, буурҕа түһүөҕэ, салгын күнүс 8-13 кыраадыска диэри сылыйыаҕа. Саха сирин соҕуруулуу-арҕаа өттүгэр +3 диэри кыраадыска тиийэ ириэрии буолуон сөп», — диэн Татьяна Маршалик иһитиннэрдэ.
Дьокуускайга чугастааҕы сууккаҕа кыралаан хаардыаҕа, хотугулуу-арҕааттан 2-7 м/с күүстээх тыалырыаҕа. Түүнүн салгын температурата-27-29 кыраадыс, күнүһүн -23-25 буолара күүтүллэр.
