РФ генеральнай борокуруорун солбуйааччы Сергей Зайцев Саха сирин баһылыга Айсен Николаев кыттыылаах мунньахха сэтинньи 14 күнүгэр өрөспүүбүлүкэ саҥа борокуруора Сергей Дябкины билиһиннэрдэ. Кини ананыытын туһунан ыйааҕы алтынньы 27 күнүгэр Россия президенэ илии баттаата. Дябкин иннинээҕи Максим Попов Калининград уобалаһыгар итинник дуоһунаска көстө.
«Сергей Николаевич Дябкин 1979 сыллаахха төрөөбүт. 20-тэн тахса сыл борокуратуура органнарыгар сулууспалыыр, Красноярскай кыраай Сосновоборскай куорат борокуруорун көмөлөһөөччүтүттэн Тыва Өрөспүүбүлүкэтин борокуруоругар тиийэ ааспыт. 2 кылаастаах юстиция судаарыстыбаннай сүбэһитэ буолар. Улахан профессиональнай уопуттаах, онуоха бэйэтин билиитин көрдөрбүт, кэлэктиип үлэтин тэрийэри сатыыр, инникилээн тутуллар хайысхалары сөпкө быһаарар», – диэн кэпсээтэ Сергей Зайцев.
Саха сирин баһылыга саҥа салалталаах борокуратуураны кытта бииргэ үлэлээһин сокуону салгыы бөҕөргөтүүгэ уонна уопсастыбаҕа итэҕэли үөскэтиигэ көмөлөһөрүн эттэ. “Биһиги иннибитигэр турар соруктары быһаарыыга бииргэ үлэлээн-хамсаан саамай улахан түмүктэри ситиһэбит», — диэтэ Айсен Николаев.
Сиһилии манна ааҕыҥ.
This post was published on 14.11.2025 17:22 17:22