«Спортивные якутяне» үөрэнээччилэр спартакиадалара өрөспүүбүлүкэ баһылыга Айсен Николаев көҕүлээһининэн сөргүтүлүннэ. Тэрээһин сылын аайы ыытыллар буолуоҕа.
Спартакиада 2024 сылга эмиэ ыытыллыаҕа, бу сыл Дьокуускайга «Азия оҕолоро» норуоттар ардыларынааҕы спортивнай оонньуулар буолалларын үрдүнэн. Бэлэмнэнии балаҕан ыйыттан саҕаланыаҕа, суруйар СИА.
Тэрийэр кэмитиэт мунньаҕар бырабыыталыстыба бэрэссэдээтэлин солбуйааччы Сергей Местников оҕолору тохтобула суох физическай культураҕа уонна спортка бэлэмнэниллиэхтээҕин эттэ. Спартакиада кэмигэр кыттааччы ахсаанынан рекорд олохтонно, 63 000 үөрэнээччи бары муниципальнай тэриллиилэртэн кытынна.
«Өрөспүүбүлүкэ баһылыга оҕо-юношескай спорт бырагырааматын бигэргэппитэ. Бу докумуонунан судаарыстыбаннай бэлиитикэ бу хайысхаҕа ыытыллар. 2022 сыл алтынньыга учууталлар уона педагогтар сийиэстэригэр спартакиаданы тэрийэр туһунан эппитэ. Бу саамай сөптөөх быһаарыы», — диэтэ Сергей Местников.
Үөрэх миниистирэ Ирина Любимова спартакиада түмүгүнэн эдэр спортсменнары бэлэмнээһин күүстээх уонна мөлтөх өрүттэрэ быһаарыллыахтара диэтэ. Бастыҥнар «Азия оҕолоро» оонньууларга путевка туталлар.
Спорт миниистирэ Леонид Спиридонов тэрийээччилэргэ махтанна. Үрдүк таһымҥа ыытыллыбытын бэлиэтээтэ. Спартакиадаҕа барыта спорт 27 көрүҥэ киирбитин эттэ. Финал Дьокуускай куоракка бэс ыйын 6 — 10 күннэригэр ыытылынна. Манна баскетбол, бокса, чэпчэки атлетика, буулдьанан ытыы, көҥүл тустуу, бадминтон, остуол тенниһа, саахымат, оҕунан ытыы көрүҥнэрэ буолла, атын көрүҥнэр эрдэ тэриллибиттэрэ. Финалга 1400 эдэр спортсмен кытынна.
