Саха сиринээҕи УГМС барыллааһынынан, өрөспүүбүлүкэҕэ өрүстэр арыллыылара буолар кэмиттэн 3-5 суукка эрдэлиирэ сабаҕаланар. Сааскы халаан муҥутуур таһыма Дьааҥы, Халыма, Алазея, Индигиркэ өрүстэргэ, ону таһынан Марха уонна Майа өрүстэргэ нуорматтан үрдүк буолара күүтүллэр.
Регион атын өрүстэригэр, эрдэттэн сабаҕалааһынан, уу муҥутуур таһыма өр сыллаах көрдөрүү кэриҥэ буолуоҕа.
Рельеф уратыларыттан итиэннэ улахан уонна орто өрүстэргэ уу муҥутуур таһыма хайдах үөскүүрүттэн Саха Сиригэр өрүстэр арыллыыларыгар кылгас кэмнээх муус харыылаах ааһыаҕа. Гидрометеорологическай быһыы-майгы мөлтөөтөҕүнэ, улахан харыы үөскүөн сөп. Ити уу эмискэ үрдээһинигэр, өрүстэр халыйыыларыгар, халаан тахсыытыгар уонна нэһилиэнньэлээх пууннар намыһах учаастактарын уу ылыан сөп.
Муус харыыта ордук: Өлүөнэ өрүскэ — Хаҥалас оройуонуттан Алдан өрүс түһүүтүгэр диэри; Алдан өрүскэ — Уус-Маайа оройуонун иһинэн; Халыма өрүскэ — Үөһээ Халыма уонна Орто Халыма оройуоннарын иһинэн сабаҕаланар.
Өрүстэр арыллыыларын болдьоҕо уонна уу муҥутуур таһымнарын уһун кэмнээх сабаҕалааһын муус устар 16 күнүгэр тахсыаҕа.
Росгидромет быйыл халаан уустук буолуо диэн сабаҕалыыр. Бу туһунан биэдэмистибэ баһылыга Игорь Шумаков Россия бырабыыталыстыбатын бэрэссэдээтэлэ Михаил Мишустины кытта көрсүһүүгэ иһитиннэрдэ.
Кини этэринэн, муус устарга дойду европейскай чааһын хоту уонна илин өттүгэр өрүстэр баар болдьохтон 15 хонук эрдэлээн арыллаллара сабаҕаланар. Ону тэҥэ болдьоҕуттан эрдэ Уралга, Сибиир соҕуруу оройуоннарыгар уонна Уһук Илиҥҥэ буолуоҕа. Камчааткаҕа — нуорматтан 10 хонук эрдэлиэҕэ. Ыам ыйыгар өрүстэр арыллыылара Европа чааһын саамай хотугу территорияларыгар тиийиэҕэ уонна Сибиир уонна Уһук Илин бөдөҥ өрүстэригэр салҕаныаҕа.
Уу таһыма нуорматтан үрдүүрэ Киин, Приволжскай, Урал, Сибиир уонна Уһук Илиннээҕи федеральнай уокуруктарга күүтэллэр. Росгидромет быһыыны- майгыны бастайааннай эрэһииминэн кэтээн көрөр, оттон суһаллык эппиэттииргэ бэйэтэ тэрийбит ГИС «Гидрология» тэрилин туттуоҕа. Систиэмэ 3-тэн 5-7 суукка диэри халаан уутун билгэлээһиннэрин быһа таһаарар кыахтаах.
