960 биирдиилээн уонна бөлөҕүнэн консультацияны Саха сирин психологтара тохсунньуга ыыттылар. Үлэ анал байыаннай дьайыы кыттыылаахтарыгар уонна кинилэр дьиэ кэргэттэригэр ананна.
Психологтар өрөспүүбүлүкэ иһигэр үлэлэрин таһынан, Ростов-на-Дону госпиталларыгар байыастары кытта көрүстүлэр, кэпсэттилэр.
Өрөспүүбүлүкэтээҕи психологическай киин дириэктэрэ Владимир Скрябин брифиҥҥэ тохсунньу 30 күнүгэр эппитинэн, аан бастаан уонна төхтөрүйэн ыытыллыбыт консультациялар бааллар. Кини эппитинэн, бүгүн Ростов-на-Дону киин 37-с биригээдэтэ көттө.
«Биригээдэлэр биир ый үлэлииллэр. Психологическай көмө байыастар баҕа өттүлэринэн ыытыллар. Бобуулаах тиэмэ суох, бойобуой стреһи кытта сибээстээх киһи кыбыстар боппуруоһа диэн суох. Барыта анонимнай, чып кистэлэҥҥэ тутуллар, толору ааты этиэ суохха эмиэ сөп», – диэтэ Владимир Скрябин.
This post was published on 30.01.2026 17:09 17:09