Балаҕан ыйын 1 күнүттэн өрөспүүбүлүкэҕэ 500-тэн тахса үөрэнээччилээх 96 оскуолаҕа медицинскэй пуун үлэлиэҕэ. Кинилэр соруктарыгар бастакы медицинскэй көмөнү оҥоруу, ыарыыны сэрэтии уонна оҕо доруобуйатын туругун хонтуруоллааһын киириэҕэ. Бу туһунан доруобуйа харыстабылын министиэристибэтэ иһитиннэрдэ.
Биэдэмистибэҕэ бэлиэтээбиттэринэн, доруобуйа харыстабылын министиэристибэтэ Саха сирин үөрэҕин уонна наукатын министиэристибэтин кытта Саха сирин баһылыгын сорудахтарын толорон өрөспүүбүлүкэ үөрэх тэрилтэлэригэр медицина көмөтүн тэрийэр дьаһаллар кэлимин олоххо киллэрэр.
«Оскуола медицинатын сайыннарарга кэмэ кэллэ – өрөспүүбүлүкэ доруобуйа харыстабылын министиэристибэтигэр уонна үөрэх министиэристибэтигэр саҥа үөрэх дьылыттан оскуолаларга медиктэри төнүннэрэн саҕалыырга сорудах биэрэбин», — диэн Ил Түмэҥҥэ Саха сирин баһылыга Айсен Николаев бэйэтин суругар бэлиэтээтэ.
2025 сылга үөрэнээччилэр уонна иитиллээччилэр доруобуйаларын харыстааһыны тупсарыы бэрээдэгэ бигэргэтилиннэ, бары муниципальнай тэриллиилэри кытта сөбүлэһии түһэрсилиннэ, оскуола медицинскэй пууннара саҥа үөрэх дьылыгар бэлэмнэрин сыаналааһын ыытылынна.
Үлэ ирдэбилгэ сөп түбэһиннэрэн ыытыллар: олохтоох салайыныы органнара өрөмүөнү уонна материальнай-техническэй базаны, медицина тэрилтэлэрэ — оборудованиенан хааччыйыыны, лицензиялааһыны уонна кадрынан хааччыйыыны ыыталлар.
«Биһиги оскуола үөрэнээччилэрин хаачыстыбалаах медицинанан хааччыйыыга усулуобуйа тэрийэбит уонна үүнэр көлүөнэ доруобуйатын», — диэтэ тустаах миниистир Лена Афанасьева.
Билигин үөрэх тэрилтэлэрэ үөрэнээччилэргэ медицинскэй көмөнү оҥорууга бэлэмнэрин бэрэбиэркэлээһин ыытыллар.
Доруобуйа харыстабылын миниистирин солбуйааччы Татьяна Павлова Жатай уонна Тулагино бөһүөлэктэрин оскуолаларыгар сырытта. Бэрэбиэркэ түмүгүнэн, Жатай бөһүөлэгин 1 уонна 2 № — дээх орто оскуолаларын, Тулагы орто оскуолатын медицинскэй пууннара толору хааччыллан саҥа үөрэх дьылыгар бэлэмнээхтэрин бэлиэтээтэ.
Тэрээһин дойду президенэ Владимир Путин көҕүлээбит «Ыччат уонна оҕо» национальнай бырайыагын сыалын-соругун толорууга туһуламмыт.
This post was published on 19.08.2025 13:09 13:09