«Кыһын Саха сириттэн саҕаланар» бэстибээл чэрчитинэн «Строганина-2019» куонкурус ыытыллыа. Манна сибиэһэйдии тоҥмут балыгы кыһыыга бастыҥ хамаанданы быһаарыахтара. Тэрээһин Дьокуускай куоракка «Триумф»-ка ахсынньы 1 күнүгэр ыытыллыа.
«Балыгы кыһыы куонкурсугар дьокуускайдар, куорат кытыытынааҕылар, биирдиилээн тэрилтэлэр уонна Арктика кытылын улуустарын бэрэстэбиитэллэрэ кыттыахтара. Хас биирдии хамаанда иккилии киһилээх — эр киһи балыгы кыһар, дьахтар сииргэ анаан бэлэмниир. Астыыр кэмнэригэр балаһыанньанан бигэргэммит ирдэбиллэри тутуһуохтара«, — диэн тэрийээччилэр этэллэр.
Күрэхтэһии үс түһүмэҕинэн ыытыллыа. Бастаан кыттааччылар дьүүллүүр сүбэҕэ эрдэттэн бэриллибит тиэмэнэн оригинальнай уонна кэрэ көстүүлээх бүлүүдэни көрдөрүөхтэрэ. Иккис түһүмэх балыгы кыһыы тиэмпэтин көрүө. Финалга кыһыы хаачыстыбата учуоттаныа.
Сайаапкалары сэтинньи 22 күнүгэр диэри Дьокуускай куорат, Ленин проспегын 15 дьиэтигэр, 104 кабинекка туталлар. Төлөпүөннэрэ 408053, e-mail: cultura521@mail.ru.
This post was published on 05.11.2019 11:48 11:48