«Муус Устар» V өрөспүүбүлүкэтээҕи ыччат бэстибээлигэр талисманы таллылар. Саха сирин 8,6 тыһыынча олохтооҕо кытынна. Ол туһунан регион салалтатын пресс-сулууспата суруйда.
Тэрийээччилэр бэлиэтээбиттэринэн, бүтэһиккэ диэри икки талисман кииристэ — Кэскил уонна Ньургуһуннар. Ити эрээри Кэскил бэрт кыранан инникилээтэ, 3 176 куолас бэрилиннэ. Ньургуһуҥҥа 3 085 киһи куоластаата.
«Кэскил» диэн «инники олох, сайдыы, үөһэ дабайыы». Бэстибээл кыттыылаахтара куруук үрдүккэ дабайан, салгыы сайдалларыгар ананар.
Кулун тутар 17 күнүгэр Дьокуускайга «Муус устар» ыччат бэстибээлэ саҕаланар.
Тэрийээччи — Саха сирин барабыыталыстыбата, өйөбүл генеральнай партнера – «Эльга» хампаанньа.
This post was published on 28.02.2025 16:52 16:52