Санкт-Петербурга Норуоттар икки ардыларынааҕы Үлэ Форума, ону тэҥэ Дьарыктаах буолуу судаарыстыбаннай сулууспатын аан дойдутааҕы ассоциациятын сүбэ мунньаҕа ыытылынна. Манна Саха сирин бэрэстэбиитэллэрэ эмиэ кытыннылар.
Форумҥа Франция, Германия, Бельгия, Швеция, Словения, Австрия, Австралия, Япония, Соҕуруу Корея, Вьетнам уонна атын дойдулар бэрэстэбиитэллэрэ, Норуоттар икки ардыларынааҕы үлэ харыстабылын экспердэрэ кэлбиттэр.
Цифровизациянан, оҥорон таһаарыыга автоматика киириитинэн сибээстээн үгүс идэлэргэ үлэһиккэ наадыйыы аччаан иһэр, онон саҥа идэлэр баар буоллулар. Манан сибээстээн үлэһиттэри маассабайдык ууратыы күүтүллэр. Онон үлэтэ суохтары идэҕэ үөрэтэн уонна хаттаан бэлэмнээн, балаһыанньаттан тахсыахха сөп. Форум кыттыылаахтара үлэлэрин уопутун атастастылар, бу хайысхаҕа ханнык саҥа сүүрээннэр баалларын дьүүллэстилэр.
Сүрүн болҕомто үлэ ырыынагын сабаҕалааһыҥҥа, тэрилтэлэр үлэҕэ наадыйыыларыгар, глобальнай миграцияҕа уурулунна.
Россия Федерациятын Дьарыктаах буолуутун судаарыстыбаннай сулууспатын үлэһиттэрин сүбэ мунньаҕар Саха сириттэн Степан Москвитин кыттан, өрөспүүбүлүкэҕэ нэһилиэнньэ дьарыктаах буолуутугар туһуламмыт үлэ, СӨ Дьарыктаах буолуу сылын тэрээһиннэрин олоххо киллэрии тустарынан кэпсээтэ.
Бүгүн өрөспүүбүлүкэҕэ биллэриллибит сылынан кэлимсэ дьаһаллар ыытыллаллар. Маныаха улахан болҕомто ыччат үлэлээх буолуутугар, үлэтэ суох дьону (3000 киһи) үөрэтиигэ ууруллар. Бу тэрээһиннэри олоххо киллэриигэ 32 тыһыынча киһини хабыахтара, 22 тыһ. киһи бастайааннай уонна быстах үлэнэн хааччыллыаҕа.
This post was published on 05.03.2018 14:00 14:00