Саха сирин национальнай библиотеката аан дойду литературатын шедеврдэрин классическай айымньыларынан коллекция цифровой бырайыагын үлэҕэ киллэрэр. Бу туһунан өрөспүүбүлүкэ баһылыга Айсен Николаев IV норуоттар икки ардыларынааҕы библиографическай конгресска биллэрдэ.
«Бу саха сирин бары олохтооҕор тиийиэхтээх аан дойду шедеврдэрин классическай айымньыларын цифровой коллекцията. Манна киһи аймах духуобунай сыаннастарын көрдөрөр, хас биирдии киһиэхэ үтүөнү, айар дьулуһууну иҥэрэр таһаарыылар киирбиттэр. Мин бу цифровой библиотека элбэх омуктаах норуоппут культурнай нэһилиэстибэтин тутаах сорҕотун быһыытынан дьиэ кэргэн ааҕыытын кэрэхсэбиллээх үгэһин бөҕөргөтүө диэн итэҕэйэбин», — диэн бэлиэтээтэ Саха сирин баһылыга Айсен Николаев.
Санатан эттэххэ, 2020 сылга Саха Сирин Россия саамай ааҕар регионунан билиммиттэрэ. Национальнай библиотека өрөспүүбүлүкэтээҕи библиотекалар күүстэрин көдьүүстээхтик түмэр. Кини регионҥа библиотека дьыалатын сайыннарыы бары хайысхаларын ситиһиилээхтик өйүүр уонна сүрүннүүр, саҥа информационнай уонна цифровой технологиялары күүскэ туһанар.
Бүгүн Саха Сирин Национальнай библиотекатын фондаларыгар Саха сиригэр уонна Россияҕа историческай уонна культурнай сыаннастаах сэдэх таһаарыылары, илиинэн суруктары уонна мультимедийнай ресурсалары киллэрэн туран, мөлүйүөнүнэн харайар единицалар бааллар.
Дьокуускайга балаҕан ыйын 19 күнүгэр диэри «Библиография в сохранении культурного наследия и языкового многообразия народов мира» IV норуоттар икки ардыларынааҕы библиографическай конгресс ыытыллар. Национальнай библиотека 100 сылыгар уонна ИИ-бородууксуйатын көрдөрүүтүгэр аналлаах тэрээһин буолар.
Саха Сирин Национальнай библиотекатын медиа киинин үлэһитэ Галина Кутугутова иһитиннэрбитинэн, Россия 85 регионуттан уонна 15 дойдуттан экспертэр, кыттааччылар кэлбиттэр. 400-чэкэ киһи кыттара күүтүллэр, итинник кэриҥэ кыттааччы онлайн холбонуоҕа.
This post was published on 17.09.2025 10:06 10:06