Дьокуускайга, «Модун» спорткомплекска, Гаврил Десяткин кэриэһигэр мас-рестиҥҥэ өрөспүүбүлүкэ чемпионатын бастакы күнүн түмүгүн ЯСИА олунньу 15 күнүгэр сарсыарда суруйда. Ыйааһыҥҥа барытыгар кэриэтэ лидердэр уларыйдылар.
Быйыл илин-кэлин түсүһүү үрдүк таһымҥа таҕыста. Киирсиигэ бу помост былырыыҥҥы лидердара, Манчаары Оонньууларын кыайыылаахтара, аан дойду уонна Европа чемпионнара киирдилэр. Өрөспүүбүлүкэ урукку чемпионаттарыттан уратыта диэн, быйыл мас-рестлиҥҥэ Россия спордун үтүөлээх маастардара кыттыбатахтара буолла. Дмитрий Попов тохтобул ыларга быһаарыммыт, Дмитрий Саввин карьератын түмүктүүр, Павел Черноградскай легионер буолар, быйыл атын регионнартан кыттар спортсменнарга көҥүл биэрбэтилэр.
Бары кэриэтэ ыйааһыҥҥа интэриэһинэй финаллар буоллулар. 50 киилэҕэ диэри дьахталлар ортолоругар быйыл Мэҥэ Хаҥалас улууһуттан үс төгүллээх чемпионка Анастасия Алексеева эмиэ кыттыбата. Кинини пьедестал бастакы сүһүөҕэр Үөһээ Бүлүү спортсменката Снежана Алексеева солбуйда. Алексеева финалга Сунтаар улууһуттан төрүттээх Манчаары Оонньууларыгар национальнай многоборьеҕа кыайыылаах Мичийэ Большакованы баһыйа тутта.
60 киилэҕэ диэри Амма улууһуттан Инесса Адамова, оттон 70 киилэҕэ диэри Хаҥалас улууһуттан Елена Алексеева чемпионнаатылар. Бу ыйааһыннар «тупик» буолаллар, ол эбэтэр Россия чемпионатыгар кыттыбаттар. Оттон 85 киилэҕэ диэри аан бастаан финалга Анна Саморцева кыайда. 1/4 финал түһүмэҕэр былырыыҥҥы чемпионка Саина Филатоваттан ордугун көрдөрдө.
Эр дьон ортолоругар карьератыгар үһүс төгүлүн өрөспүүбүлүкэ чемпионатын кыһыл көмүс мэтээлин Мэҥэ Хаҥалас улууһуттан Артур Жирков ылла. Финал киирсиитигэр Уус Алдан улууһуттан Гаврил Никитины кыайда. Оттон кини биир дойдулааҕа Иван Никифоровы кытта бастакы эргииргэ киирсиитэ ордук ыараханнык ааста.
70 киилэҕэ диэри былырыыҥҥы чемпион Айсиэн Мигалкины финалга 2:0 ахсаанынан Эдьигээнтэн Василий Чемпин кыайда. Уус Алдан улууһун бэрэстэбиитэлигэр уустук сетка түбэстэ. Арассыыйа чемпионатыгар Мигалкин реванш ыларга кыһаллыан сөп.
Амма улууһуттан 75 киилэҕэ диэри аан дойду помостун лидерэ Василий Захаров 80 киилэҕэ көһөн, эрэллээхтик кыайыылааҕынан таҕыста. Кыһыл көмүс мэтээллэр коллекцияларын Горнай улууһуттан төрүттээх Аан дойду, Арассыыйа уонна Манчаары Оонньууларын чөмпүйүөнэ Семен Борисов (90 кг диэри) толордо. Оттон 125 кг диэри өрөспүүбүлүкэ чемпионунан Үөһээ Бүлүү улууһуттан Эрчим Баппаҕай ахсыс төгүлүн таҕыста.
This post was published on 16.02.2026 14:03 14:03