Россия сүүмэрдэммит хамаандата Москваҕа буолбут дойду чемпионатын түмүгүнэн сүүмэрдэммитэ. Сайаапка быһыытынан, аан дойду чемпионатыгар Саха сирин 12 спортсмена кыттар.
Эр дьон хамаандатыгар Артур Жирков (60 кг), Егор Свинобоев (80 кг) Мэҥэ Хаҥаластан, Артём Зорин (65 кг) Сунтаартан, Айсиэн Мигалкин (70 кг), Айсен Атастыров (85 кг), Дмитрий Попов (105 кг) Уус алдантан, Василий Захаров (75 кг) Амматтан уонна Семён Борисов (90 кг) Горнайтан кытталлар.
Дьахталлар хамаандаларыгар Светлана Молукова (65 кг), Саина Седалищева (75 кг) Чурапчыттан, Марина Федоренко (70 кг) Хаҥаластан уонна Татьяна Баишева (85+ кг) Амматтан.
Ааспыт сыллааҕы чемпионаты кытта тэҥнээтэххэ, дойду хамаандатын састааба толору саҥардылынна. Урукку састааптан Артур Жирков, Василий Захаров уонна Дмитрий Попов киирэллэр.
Хамаанда спортивнай бэлэм федеральнайдааҕы киинигэр толору медицина көрүүтүн ааһыаҕа. Ол кэннэ хамаанда састааба чуолкайданыаҕа. Билигин спортсменнар Сочига түмүктүүр бэлэмнэниини ааһаллар.
Санаттахха, мас-рестлиҥҥа аан дойду чемпионатын Монголия Архангайскай аймак ылар, барыта 17 комплект наҕараада оонньонор.
