Предпринимательство министиэристибэтэ, Дьокуускай куорат дьаһалтата, «Көмүлүөк» хампаанньа, «Көмүлүөк тула» арт-кулууп айар дьону худуоһунньуктар куонкурустарыгар ыҥырар. Дьаһалы регион култуураҕа уонна үөрэҕириигэ министиэристибэлэрэ өйүүллэр. Тэрээһин «Кыһын Саха сириттэн саҕаланар» бэстибээл чэрчитинэн ыытыллар.
«Айар куттаах көҥүл худуоһунньуктары өйүүр уонна салгыы талааннарын сайыннарар сыаллаах «Саха сирин кыһыҥҥы оһуора» куонкуруһу тэрийэбит. Национальнай култуурабытын көрдөрөбүт, креативнай индустрияны көҕүлүүбүт«, — диэн этэр тэрийээччи, «Көмүлүөк» хампаанньа салайааччыта Ольга Григорьева.
Кини иһитиинэрбитинэн, куонкуруска ким баҕалаах бары кыттар. Балаһыанньа быһыытынан, уруһуй кыһыҥҥы тиэмэҕэ, илиинэн, ааптарга чугас ханнык баҕарар кыраасканан толоруллубут буолуохтаах. Кыттааччы биир эрэ уруһуйу тиксэрэр.
Үлэлэри сэтинньи 18 — 29 күннэригэр туталлар. Аадырыстара: Ленин проспегын 36-с нүөмэрдээх дьиэтэ. Сиһилии бу нүөмэрдэргэ эрийэн билсиэххитин сөп: 89142712702, 89142701320.
Куонкурус түмүгүнэн бастыҥ үлэлэр талыллыахтара, сыаналаах бириистэринэн, махтал суруктарынан эҕэрдэлэниэхтэрэ. Куонкурус саамай киһи болҕомтотун ылара — бастыҥ уруһуйдьуттар «Көмүлүөк» тэрилтэ худуоһунньуктарын хамаандатыгар киллэриллиэхтэрэ.
Түмүк 2019 сыл ахсынньы 1 күнүгэр «Көмүлүөк» сүрүн сирэйдэригэр @art-klub_kameleka , @kamelek888 тахсыаҕа. Бу күн «Триумф» СК наҕараадалааһын тэриллиэ.
