Саха сиригэр киинэ индустриятын сайыннарыыга Ил Дархан Айсен Николаев сорудаҕынан бу салааны өйүүр туһунан өрөспүүбүлүкэтээҕи сокуон оҥоһуллар. Докумуон култуура министиэристибэтинэн саха киинэтин сайдыытын кэнсиэпсийэтэ ылылыннаҕына бэлэм буолар. Ол туһунан СИА-ҕа регион пресс-сулууспата иһитиннэрдэ.
«Сахафильм» киинэ хампаанньатын дириэктэрэ Сардана Саввина кэпсээбитинэн, Саха сиригэр киинэ индустрията сайдыытыгар кадрдар наадалар. Билигин анимацияны уонна саҥа технологиялары киллэриэххэ наада. Бу соруктары анал кииннээх уонна киинэ павильоннаах киинэ комплексын баазатыгар толоруохха сөп диэтэ кини.
«Бастаан кииинэ павильону баар эбийиэккэ тутуохха сөбүн толкуйдаабыппыт, ити эрээри, хомойуох иһин, кээмэйинэн да, атын параметрдарынан да ол дьиэ сөп түбэспэт. Уһук Илини уонна Арктиканы сайыннарыы министиэристибэтинэн федеральнайдааҕы үбүлээһини ылар былааннаахпыт. Маннык былаһаакка чуолаан Саха сиригэр баар буолуутун туоһутунан Уһук Илиҥҥэ биһиэхэ эрэ киинэни оҕҥорон таһаарыы уопута баара буолар», – диэтэ Саввина.
